Recientemente cu presencia di Gobernador su Excelencia sr. Fredis Refunjol y Minister di Cultura, sr. Otmar Oduber conhuntamente cu directora di Monumentenbureau Sra. Yvonne Webb-Kock, a desvela e prome Seyo di Monumento Proteha oficialmente na Fort Zoutman. E Seyo Monumental ta un proyecto di Monumentenbureau. E Seyo ta fungi como un simbolo di identificacion pa henter comunidad cu e monumento concerni ta inscribi den e Registro di Monumento y ta keda bao proteccion segun ley. Seyo Monumental ta acopla cu e proyecto di borchinan di direccion di ATA na puntonan strategico. Banda di e aspecto di guia comercial, e seyo lo por identifica y yuda guia e turistanan na e sitionan di gran importancia pa nos herencia cultural den forma di nos edificionan. Ambos proyecto hunto ta brinda nos bishitantenan e opcion pa cera conoci cu nos cultura un poco mas di cerca. Tanto nos herencia tangibel, pues den e aspecto material den forma di e edificionan pero tambe e historia tras di esakinan, e aspecto di nos herencia intangibel. Ken a biba den e edificionan aki of kico tabata nan funcion. Ta bay tin alrededor di 35 edificio cu ta bay ricibi e seyo oficial aki. Banda di e seyo lo bin tambe un borchi cu un splicacion amplio di cada monumento.

E Seyo ta fungi como un simbolo di identificacion pa nos localnan tambe cu hopi biaha no ta consciente cu ta trata di un edificio cu ta protegi pa ley como un monumento. Promedio di e seyo lo crea un curiosidad y interes mas grandi den nos comunidad pa locual ta trata nos herencia tangibel. Cu e seyo y borchi nos comunidad lo ta miho informa creando mas aprecio pa nos historia y cu cada un lo por comparti esaki cu nos bishitantenan debidamente. E simbolo a wordo diseña door di Monumentenbureau mes cu aprobacion di nos Minister. Ariba nos casnan nos antepasadonan tabata decora poniendo varios simbolonan cu diferente nificacion. E simbolo scogi ta esun cu ta refleha e forma parecido di un flor. Su nificacion den nos casnan decora ta "proteccion", pues un proteccion pa e cas. Despues di segunda guera mundial, internacionalmente a tuma e color blauw pa medio di e "blue shield" pa identifica monumento. E sitio di pone e simbolo lo ta riba e porta principal di e edificio. 
Durante e ceremonia oficial Minister Otmar Oduber a gradici Su Excelencia Gobernador di Aruba Sr. Fredis Refunjol pa cu su presencia y sosten semper den crea conscientisacion pa locual ta trata nos cultura. Siendo un representante directo di Reino Hulandes, sosten y presencia di nos Gobernador sigur ta pone un peso adicional na e importancia di e proyecto. E mandatario encarga cu maneho di Cultura pero tambe di Turismo no por a keda sin gradici A.T.A. pa nan sosten. Aruba ta un pais cu ta depende di e industria turistico, conservacion y mantencion di nos cultura ta di suma importancia. Ricibiendo un gran cantidad di bishitante pa aña cu un diversidad enorme pa locual ta perspectiva cultural, ta importante pa nos localnan sa nos historia corectamente y pa por traspasa esaki debidamente, creando e balansa ideal entre turismo y cultura. A.T.A. a tuma como e institucion asina importante den e industria, e responsabilidad den esaki y a fungi como ehempel pa otro companianan. E ta un responsabilidad social cu mundialmente ta wordo reconoci como 'Corporate Social Responsibility' (CSR) y ta un tendencia cu companianan rond mundo ta atende cu ne.  

Expresionnan haci den e articulo aki no necesariamente ta refleha opinion di ArenaPoliti.co