MEP: Mike Eman ta aproba cu Otmar Oduber ta manda kita periodista for di trabou?
ORANJESTAD -- Siman pasa a wordo domina pa e pleito interno den AVP entre e minister Otmar Oduber y e periodista di Diario. Pasobra Otmar Oduber a haya cu e periodista a papia cun'e na un tono fresco, Otmar Oduber a manda kita e periodista for di trabou.
Tur hende conose e periodista ey como esun mas fresco na Aruba, esun cu mas ta falta respet especialmente na hende muher. Esun cu den gobierno anterior a lastra Marisol Lopez-Trompy Nel Oduber na masha mal forma, pero ningun dia ni Marisol ni Nel a usa nan influencia pa hunga cu su pan. Nan a cana e camindanan corecto, nan a cudi na Corte y nan a gana nan casonan. Por cierto, mientras cu e peridosita ey tabata lastra Nel y Marisol, Otmar Oduber tabata sinta gosa y apoya e periodista den su actonan baho.
Desde cu gabinete MIke Eman ta na mando, e mesun periodista ey a sigi cu su atakenan feros y bou faha contra especialmente e lider actual di MEP Evelyn Wever-Croes. Evelyn a usa su influencia pa kit'e for di trabou? No! Ela' hib'e Corte y a gana hopi placa na daño y compensacion di e periodista y su corant.
Awor dicon Otmar Oduber a dicidi di mesora usa su influencia pa kita e periodista for di trabou? Ta kiko tanto di e tin di sconde? Pasobra ta algun tema hopi delicado e periodista a trese padilanti, cu por hinca Otmar Oduber un biaha mas den investigacionnan criminal, mucho mas serio cu henter e caso Fondo Desaroyo San Nicolas.
Y e pregunta mas crucial ta: unda Mike Eman ta den e discusion aki? Pasobra tur hende sa cu e periodista aki no ta hasi NADA sin aprobacion di Mike Eman. E periodista aki ta sinta den e think tank di Mike Eman y fiha strategia con pa caba cu oponentenan. Si no tin argumento, lastra oponente y nan famia den lodo, esey ta e tactica diario di Mike Eman, su periodista y su corant.
Pues dicon Mike Eman ta keda keto? Asina e ta aproba e abuso di poder di Otmar Oduber den esaki tambe. Of acaso esaki ta un midimento di forsa entre Mike Eman y Otmar Oduber?
Cualquier cu ta e caso, Mike Eman como lider di e partido mester asumi su responsabilidad y para e disputa aki. Nos pais tin hopi reto su dilanti, pa mester dedica tanto tempo y energia na un pleito interno cu a sali for di man
Expresionnan haci den e articulo aki no necesariamente ta refleha opinion di ArenaPoliti.co