Nos por a scucha claramente durante un rueda di prensa yama pa Minister Oduber mes pa cu e situacion durante un programa di radio tabata cuestiona ATA y Minister Oduber pa cierto gastonan. Den mi concepto cu pueblo no por acepta atrobe un otro caso pa paga pa guera di Otmar Oduber y Nelson Speed Andrade. Sr. Andrade a haci su trabao di prensa y Otmar Oduber como Minister mester a contesta e preguntanan cu Sr. Andrade tabata hacie. Sinembargo tabata obvio cu e preguntanan tabata asina comprometi y por a sinti tambe e bos di Minister Oduber cu e preguntanan aki no tabata na nan lugar pa e contesta pasobra nan tabata preguntanan hopi fuerte y directo y por a sinti cu Minister Oduber no tabata kier of no tabata por contesta y manera semper ora cu Otmar Oduber ta sinti cu e no tin salida mesora e ta bay den contra atake y ta cuminsa menasa y a menasa cu lo hiba Sr. Andrade corte. Wel den mi concepto no tin ningun argumento pa bay corte. Ta simpelmente manera mi a menciona caba, cu Sr. Andrade tabata haci su trabao y Minister Oduber no tabata kier y no por a saca ningun contesta of tabata tin miedo pa cierto informacion sali bin padilanti. Ta interesante si pa scucha e berdadnan cu lo sali for di den corte si tin caso. Sinembargo si bay corte, ta Sr. Oduber mes mester core cu tur e gastonan aki y no pueblo, pasobra ta un cantidad di caso nos pueblo a paga caba y ta pagando casonan di Ministernan di AVP. E Minister cu a perde mas caso den corte ta Minister Oduber y casonan cu nos pueblo a paga. Wel esaki si pueblo no por acepta sin mas, ta basta caba cu e malgastamento aki di placa di e pueblo humilde y trahado cu tur dia tin di traha duro pa sobrevivi pa un pida pan pa nan yiunan. Si Minister Oduber ta sinti cu loke Sr. Andrade ta bisa no ta berdad, cu e ta lanta testimonio falso of a falt’e respet, e caminda corecto ta trece tur e pruebanan dilanti pa pueblo wak ta ken ta papia e berdad y ken no ta papiando berdad, masha facil, pero no core cuminsa grita cu ta bay corte anto kere cu pueblo mester paga atrobe! E asunto aki no tin nada di haber cu pueblo y nada oficial di Gobierno. Esaki ta simpelmente un caso personal di Sr. Oduber y Sr. Andrade y pesey pueblo no mester acepta pa paga e gastonan aki y spera cu esaki ta bon cla tambe den parlamento y parlamentarionan. Wel mi ta spera pueblo tene tur esakinan na cuenta pa wak ta ken ta bay paga atrobe.

Expresionnan haci den e articulo aki no necesariamente ta refleha opinion di ArenaPoliti.co