Pueblo di Aruba, cu gran asombro bo por a tuma nota di e declaracionnan di un “periodista” na radio relaciona cu e celebracion di dia 18 maart na Hulanda. Motibonan ta cu e.o. ta via ATA e sumanan ta sali pa dicho evento y tambe a categorisa tur esnan cu a viaha pa Hulanda como “chupa cabra”, aki incluyendo sr. Paul Croes, sra. Desiree Croes, sr. Melvin Tromp y sr. Jeffrey Kelly. Tur e criticanan ta basa riba malgastamento di placa di pueblo y di prioridadnan robes! Un otro periodista den e mesun programa a hasta corda riba e grandinan na Aruba. Un cuestion cu nunca a sali for di boca di dicho periodista relaciona cu maneho di e gobierno actual! E declaracionnan di mes ta hopi cuestionabel y ta difama e minister encuestion di manera directo. Durante e rueda di prensa di e minister en cuestion, su persona a logra pone un klem na boca di e prome periodista y asina lag’e mal geklem atras. Esaki door di un menasa di hiba e periodista corte. Consecuentemente, tur presente lo a cuminsa haya un holor hopi desagradabel cu tabata biniendo for di direccion di e prome periodista. Probablemente el a bay af den careda. E no por a wanta e presion di e menasa di minister Otmar Oduber. Te ey e periodista cu a logra sali pafor y mustra riba malgobernacion a yega. Tur e fandanga aki ta pasobra e asunto lo ta tratando minister Otmar Oduber. Awor, for di dia 22 maart te cu 24 maart 2016, a tuma luga na Aruba e famoso P3A Conference den Renaissance Convention Center. Esaki a wordo regla via un tratado nr 013296 entre Reino Hulandes, Nacionnan Uni y Aruba. Den prome instante e ta mustra masha interesante y bunita pa Aruba. Pero si bo bay tras di e berdad y nada mas cu e berdad di e conferencia aki, bo ta haya varios punto di decepcion y di indignacion. E prome ta cu  e conferencia su gastonan ta wordo cubri/paga pa mas cu 90% door di e Gobierno di Aruba (lesa bo nomber akinan) For di e carta manda pa Gyan Chandra Acharya, na punto 5 tin for di A te cu K, gastonan cu gobierno di Aruba mester cubri. Na punto 6 tambe for di A te cu D, Aruba su gobierno tin cu cubri gastonan e.o. pasashi di casi 300 hende, estadia pa e guestnan na US$ 250 pa dia, terminal expenses di $76 si nan no ta di New York y $126 si nan ta di New York. Tambe placa pa cuminda balora na $128 pa dia pa participante. Si e periodista por conta y calcula cuanto placa ta bay na e conferencia di Mike Eman aki, su persona lo haya sa cu ta mas cu 1.2 miyon florin tin na gasto! No ni papia ainda di overtime di polis, ambulance y tur otro garantianan cu gobierno di Aruba mester provee. Pa colmo e topico ta e endeudamento di país Aruba cu e proyectonan PPP. Aruba su pueblo tin cu bay paga pa mas cu 30 aña miyones di florin, sin cu esaki ta bisto den gobierno su boekinan. Na tres PPP proyecto so pueblo di Aruba tin cu bay paga mas di 1.2 biyon florin (1.200.000.000). E participantenan ta representantenan di varios isla y paisnan pober. Tambe instancianan financiero, manera djaka, ta presente y ta haci encuentro cu e pober victimanan. Esaki ta mescos cu un trabao di pimpi cu Mike Eman ta efectuando. Aruba mes ta haya solamente e gastonan pa paga! Propaganda pa e lunatico PM y probecho financiero pa esnan cu ta bay financia e proyectonan na e victimanan cu firma cu nan! Aruba su pueblo mes ta keda manera un hende cara pa muraya sin bisa nada, sin haya nada y sin mag di reclama nada! Ta net awor e dos “periodistanan” aki mester a sali y cuestiona e evento aki y puntra kico e pueblo di Aruba ta bay beneficia di dje? United Nations, Reino Hulandes y institutonan financiero ta probecha di e pueblo di Aruba danki na e propio Prome Minister di e pais. Tur ta haci nan precies riba e país y pueblo ta keda atras cu e stinki. UNDA E PERIODISTANAN SKERPI A KEDA DEN ESAKI? PASOBRA TA MIKE EMAN?

Expresionnan haci den e articulo aki no necesariamente ta refleha opinion di ArenaPoliti.co