E situacion di nos educacion. 
Na e momento aki, mayoria mayornan a ricibi e raport di nos yiunan. Tin mayor cu ta super contento y orguyoso y tin mayor cu ta realiza cu lo mester traha mas duro pa logra un mihor 3e rapport. Maestronan tambe ta realiza cu e trabou duro cu nan ta haci, cu of sin e material necessario, no ta duna e resultado cu nan a spera. Na Aruba, den 6e klas, menos cu 15% ta logra e nivel di Havo y VWO, caminda cu na Curaçao y Hulanda e porcentahe ta riba 40%. Ta obvio cu nos tur ta traha duro, sinembargo e trabou duro no ta duna e resultado cu nos tur merece. Ta pesey nos mester bay traha mas efectivo. Nos mester  haci uzo di tecnologia y conocemento cu ya caba ta disponibel, pero na un manera mas efectivo pa logra mehora Enseñansa na Aruba. 

Pakico e resultadonan na Aruba ta asina abou? 
Tin 3 motibo primordial cu ta domina e resultadonan di nos yiunan den enseñansa: Mayor, Maestro y Minister di Enseñansa. 
Como mayor, nos tin cu percura  pa e mucha drumi bon, cu el a come prome cu e yega scol, pa asina e por concentra riba su les y pa e no falta hopi les. Ademas e mester cumpli cu su tareanan. 
Como maestro e trabou mas importante, ta pa crea un ambiente caminda e mucha ta sinti su mes bon, pasobra tur estudio ta bisa cu un ambiente positivo ta importante. Ademas e maestro mester tin material disponibel pa e por traha cu n'e y su splicacion mester ta comprendibel y e lo mester tin e pasenshi pa splica y ripiti varios biaha. E di tres factor importante ta e Minister di Enseñansa. 

Kico un Minister di Enseñansa mester haci? 
Un Minister di Enseñansa lo mester ta esun cu ta aloca e fondonan necessario pa e tur e trahadornan na e scol, directiva y maestro por ehecuta nan trabou manera debe ser. Ppr ehempel,  comienso di scol, tur material (Curiculo, buki de teoria, buki di tarea, material pa practicum, toetsnan) mester ta presente. Durante e aña e maestronan y directiva mester haya training pa nan por sigui implementa tecnologia y innovacion, cu ta tuma lugar mas rapido cu nunca, pero tambe pa nan por haya mas inspiracion con pa soluciona e diferente problemanan cu nan ta encontra. Net esey falta. Klasnan ta demasiado grandi, cu ta stroba y mucha y e maestro y no tin un Curiculo fiho pa tur scol basico. E nivel na cada scol por varia. Pero ora di bin cu exigencianan pa por midi e nivel di e mucha, si ta midi cu un midi extricto? Esey ta crea un realidad falso. Pasobra ainda, na Aruba, un 6.9 na un scol lo ta un 7.9 na un otro scol y vice versa. No tin un garantia cu e nivel ta mes cos. Ta pesey e ta importante pa laga tur mucha haci e mesun test pa por compara e nivel. Na Hulanda y na Curaçao, tur mucha ta haci un test den klas 6. Na Aruba ta solamente 30%  tin mag di haci e toets pa Havo, pero tin lugar pa 200 mucha so (=14%). Akinan tambe, Minister di Enseñansa mester facilita, laga tur mucha haci e test pa asina tin mas transparencia pa mehora e nivel y resultadonan di nos Enseñansa aki na Aruba. 

Kico lo ta e solucion? 
"Cada problema ta bin cu su solucion."  Esey ta un dicho cu nos sa uza hopi den nos comunidad. E ta berdad. Pa soluciona e problemanan den enseñansa, nos mester tin e curashi prome, pa admiti cu cos NO ta bon y cu e ta un situacion  indesea. Sin punta dede riba solamente e mucha, e mayor of maestro. Nos a hereda un systema di Educacion cu na aña 2016 no ta funciona mas pa logra e resultadonan cu nos tur merece. Nos muchanan, nos como mayornan, maestronan, tur merece un resultado mas miho cu locual ta wordo logra aworaki. Tur ta traha duro, pero a bira tempo pa nos bay traha efectivo. Pa logra esey, nos mester haci uzo di e tecnologia y innovacion cu ya caba a penetra nos communidad na un manera profundo. Awo cada cas, cada scol tin aceso na un conocemento asina extenso via internet. Locual falta na un manera grandi, ta e fondonan,  habilidad, determinacion y conocemento pa yega na e informacion y usele na un manera efectivo pa asina catapultisa Enseñansa na Aruba den Ciglo 21! Esey ta e trabou di un Minister di Enseñansa.  #MSJMEP

Expresionnan haci den e articulo aki no necesariamente ta refleha opinion di ArenaPoliti.co