Den un comunicado anterior mi a trese dilanti cu regio Paradera tin mester di un scol basico aserca. E necesidad di un scol basico aserca den regio di Paradera, tin di haber cu e cantidad di alumnonan cu ta bay un scol basico procedente di Paradera cu a redobla den cantidad. Na aña escolar 2013 – 2014, regio di Paradera tawata ta tin un cantidad di 1163 alumno procedente di Paradera cu tawata bay un scol basico. E cantidad di alumnonan cu ta sigui un scol basico procedente di Paradera a redobla, como cu e cantidad di habitantenan di regio Paradera a redobla den habitante. A base di rapport di CBS di aña 2010 por mira cu na regio di Paradera tawata tin un cantidad di 12024 habitante. Un otro punto cu mester tene cuenta cu ne ta, cu a base di rapport di CBS di aña 2010 tawata ta tin 101484 habitante registra na Aruba. Den un comunicado di 9 di maart 2016, director di Censo a trese dilanti cu actualmente na Aruba tin 119044 habitante regristra. Cual cu ta hasi cu tur regio aki na Aruba tambe a bin ta aumenta den cantidad di habitante.Actualmente na Paradera tin tres scol basico: Maria Goretti College, Colegio Pastoor Kranwinkel y Faith Revival. Den bario di Ayo tin Dependance Ayo y ta bou di maneho di Maria Goretti College. Pa es motibo mi a conta e scolnan como un scol y e cantidad di alumnonan hunto. Tur tres scol basico conhuntamente tin un averahe total entre 850 pa 870 luga pa alumno. Cual cu ta un diferencia di un averahe di 300 luga menos pa e cantidad di alumno cu ta bay un scol basico procedente di Paradera.

Pa medio di rapportnan di enseñansa por a saca afo, cu na regio di Paradera mas di 50 % di alumnonan cu ta bay un scol basico procedente di Paredera, ta bay un scol basico den un otro regio. Pa e situacion ta visual mi a pone situacion den un tabel.

Door di a compara cu e situacion menciona di regio Paradera cu otro regionan e resultado ta lo siguente:

• Na regionan Noord ./ Tanki Leendert, Oranjestad y Santa Cruz  tin un averahe di 72 pa 76 % di alumnonan cu ta bay scol basico den na mes un regio.
  
  
• Na regio di San Nicolaas tin un averahe di 90 % di alumnonan cu ta bay un scol basico den nan mes un regio.
  
  
• Locual cu ta regio di Savaneta ta den un situacion similar cu Paradera. Tocante e situacion di Savaneta lo mi trese dilanti den un otro comunicado.

Banda cu un scol basico aserca den regio di Paradera ta un necesidad, un otro punto cu ta hunga un rol grandi aki ta e localidad unda e scol mester bin. Esaki ta un punto cu sigur mester bay traha mas amplio riba dje.

Expresionnan haci den e articulo aki no necesariamente ta refleha opinion di ArenaPoliti.co