Hamas un pueblo mester tin miedo pa hisa su bandera. 

STA CRUZ – Na ocasion di celebracion di Dia di Himno y Bandera partido MEP a organisa actividadnan riba e dianan 17 y 18 di maart cu tabata e actividadnan mas mihor bishita riba henter nos isla. Durante e actividad lider di MEP Evelyn Wever-Croes dilanti di un multitude grandi a duna un compromise importante na pueblo di Aruba: una bes cu MEP ta den gobierno lo caba cu henter e polemica entorno e color di bandera, y lo percura pa cada hogar ricibi un bandera oficial pa asina ningun hende mas mester sinti temor di hisa su bandera.

“Na prome lugar mi kier gradisi cada un di boso cu a sostene nos den hasi e evento un exito rotundo. Boso a demostra cu nos ta cla pa e solo sali pa caba. Ta hopi bunita di mira e orguyo, e expectativa cu e celebracionnan a trese apesar di tur reto.
E reto principal tabata e tantisimo menasanan di boet pa esnan cu no hisa e bandera di color corecto. E polemica aki ta di condena, pasobra hamas un pueblo mester sinti temor di hisa su bandera. Esey ta dictadura! Una bes nos ta den gobierno nos lo soluciona e polemica aki, oficialisa e color original y percura pa cada cas haya un bandera ya nunca mas tin discusion.
Pasobra nos ta arubiano orguyoso, irespecto si bo a nace na Aruba si of no, bo a hasi e baranca aki bo hogar bo pais, y bo merece di por hisa nos bandera cu orguyo, y no cu miedo.
Un otro polemica ta e historia real di nos Status Aparte. Nunca tabata tin discussion riba esaki, te dia cu Gabinete Mike Eman a sinta y awor p[a 7 anja consecutive ta polemica so tin. Cada biaha di nan ta inventa un otro storia, pa bruha tera. Pero cu MEP den gobierno nos lo pone e polemica bai drumi trankil ora nos pone e historia real di Status Aparte riba papel, publike y duna les na scolnan riba esey. Ya no tin ningun discussion mas.
Y una bes cu cada cuidadano por hisa su bandera cu orguyo atrobe y sin temor, y por conta e historia real sin polemica, nos por sigi atende e retonan grandi cu nos pais tin pa enfrenta.
E problemanan di nos pais ta serio, sinembargo e solucion no ta imposibel. Si bo tin vision, curashi y determinacion, nos por logra.
Di curason danki pa demostra e gran stimacion cu cada un di boso a demostra cu e celebracionnan grandi riba Dia di Himno y Bandera, e amor real y amor genuino pa nos pais.
Danki na tur hende cu a celebra e dia aki cu orguyo, a demostra e Arubianismo di tempo di Betico. E ta yena nos cu speransa, y cu forsa pa lucha pa nos pais. E speransa cu e solo ta sali pa tur y trese bienestar na un y tur”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co