ORANJESTAD - Minister Plenipotenciario drs. Alfonso Boekhoudt pa hopi aña a dirigi APA NV exitosamente. Te ainda e ta masha envolvi den e desaroyonan cu ta tumando luga. Asina e tabata presente ora cu ehecutivonan di Port of Amsterdam (PoA) a duna un presentacion di nan plannan y tabata presente tambe na momento di inauguracion oficial di Barcadera Multicargo Sea Terminal. Boekhoudt, kende tabata un di e oradornan, a bisa di ta sinti'e masha orguyoso di mira con e waf a keda.

"Mi ta sinti mi masha contento awe. APA NV ta un tremendo compania estatal y mi ta kere cu henter Aruba ta orguyoso di loke APA NV ta significa y di su importancia pa nos isla, pa nos comunidad y e empleadonan. Via APA NV, nos waf di carga, mayoria di producto ta drenta Aruba. Pa wak con nos waf ta bay den un desaroyo asina grandi na Barcadera caminda nos ta trece un segregacion entre maneho di carga y loke nos kier haci na e waf crucero na Oranjestad, unda nos ta bay haci algo specifico pa turismo crucero, ta algo bunita."

Minister Boekhoudt a splica cu e desaroyo positivo aki pa loke ta e waf na Barcadera, a tuma su tempo. "E ta brinda un bon garantia pa futuro, mirando cu na Barcadera ta bay tin un bon enfoke con ta bay maneha nos carga, su importacion den un forma mas eficiente y miho y di otro banda un bon prospecto pa futuro tambe. Ta bay tin mas atencion y enfoke kico ta bay haci na Oranjestad, kico nos ta bay haci den nos awanan teritorial pa por amplia mas ainda e servicionan di APA NV. "

Pa loke ta e funcion di un hub di e waf nobo, sr. Boekhoudt a bisa cu e waf di Barcadera tin un capacidad mas grandi cu esun cu tabatin na Playa. "Nos por pone mas container aki, nos por handle (baha y carga) hopi mas container mas lihe y tambe nos por handle mas barco pareu di loke nos tabata haci na Oranjestad. Na Oranjestad, nos tabatin un kade grandi, pero nos tabata maneha dos proceso, di crucero y carga. E dos procesonan aki semper tabata den un 'conflicto' cu otro. "Door cu a separa e waf di carga y di crucero nan ta bay wordo maneha den un miho forma. "Moviendo pa dilanti nos ta spera di por atrae un cierto tipo di transshipment pa Aruba. Tin hopi mas transito cu ta tuma lugar den nos region y tin hopi desaroyo tumando lugar tur rond di nos, na Panama entre otro. Desaroyonan caminda nos ta pensa cu Aruba por bay hunga un rol den nan. Pero, pa por gara e oportunidad, bo mester tin e infrastructura y esey ta loke nos a pone awor. Nos enfoke ta pa amplia nos servicionan y traha riba e funcion di un hub."

Expresionnan haci den e articulo aki no necesariamente ta refleha opinion di ArenaPoliti.co