Acuerdo di clima a keda firma pa Prome Minister di Aruba riba 'Earth Day' den nomber di Reino Hulandes. 

ORANJESTAD/NEW YORK - "Earth Day" door di Nacionnan Uni simbolicamente escogi pa firma e acuerdo di clima cu ya na december a wordo cera na Paris, a haya un nificacion special. Un acuerdo di hopi importancia mirando su impacto grandi den forma positivo pa pone un paro na loke ta e forma devastador con cambio di clima ta bayendo. 170 mandatario y embahadornan di tur parti di mundo a firma e acuerdo di clima cu ta drenta na vigor na momento cu 55 pais ratifik'e. 55 pais cu hunto ta produci 55% di gasnan manera CO2 cu ta dañino pa medio ambiente. Pa Reino Hulandes a firma Prome Minister di Aruba Mike Eman. Esaki tambe tabata algo special y unico.

E acuerdo ta encera cu a cambio di e gasnan dañino ta bin cu fuentenan di energia limpi manera energia solar y di biento. China, e pais responsabel pa dañonan grandi na medio ambiente mundial a anuncia caba di lo ratifica e acuerdo di clima. Esey ta un paso den e bon direccion. E isla chikito Aruba ta haciendo hopi caba pa ta 100% sostenibel na 2020. E isla cu tin biento y solo na abundancia ta haciendo bon uzo di e fuentenan natural aki y ta sigui den e rumbo cu a scoge.

Eman a sinti su mes masha orguyoso di por tabata parti di e evento historico aki cu a tuma luga na New York. "Cu Hulanda a pidi Prome Minister di Aruba pa firma e acuerdo aki den nomber di henter Reino Hulandes ta yena mi cu orguyo. No ami so, pero tur Arubiano por sinti su mes orguyoso, pasobra Hulanda no a pidi Mike Eman, pero Prome Minister di Aruba pa haci e acto aki. Tambe pa e islanan Hulandes Caribense cu den e contexto aki ta coopera cu otro y mustra riba e beneficionan mutuo, poco poco por mira cu e pensamento pa nos traha hunto den Reino basa riba un vision comun treciendo na mesa beneficionnan cu ta haci Reno Hulandes mucho mas solido, ta muestra di un bon futuro pa Reino." Eman a enfatisa cu Ministerio di Asuntonan Exterior ta envolviendo Aruba mas y mas den nan esfuersonan rond mundo accentuando e trabounan grandi cu Aruba ta haciendo riba tereno di sostenibilidad.

"Tabatin diferente panel aki tambe, unda sea nos a actua como panelista of como orador y den cada un di nan tanto e pensamento di Reino como e vision di Aruba a keda articula y comparti cu hopi pais. Paisnan cu cada dia mas y mas ta hayando un aprecio grandi pa e vision di Aruba, e ambicion y pa sigui desaroya y eleva e calidad di bida di nos hendenan, pa ta un pais sostenibel. Pa loke ta energia renobabel hopi pais kier bin Aruba pa comparti nos conocemento y experiencia riba e tereno aki. E ta un sentimento special y unico pa mi como yiu di un isla chikito di por ta parti di algo den un contexto asina grandi," Eman a bisa na final. E ta sin duda algo grandi y extraordinario. Aruba, presente den e salanan di Nacionnan Uni, como parti di e grandinan di mundo.

Expresionnan haci den e articulo aki no necesariamente ta refleha opinion di ArenaPoliti.co