Acuerdo di Clima a keda firma riba Dia Mundial di Mama Tera na New York.
Un acuerdo historico den mundo. 

ORANJESTAD/NEW YORK - Diabierna cu a pasa, riba Dia Mundial di Mama Tera 2016, den e edificio di Nacionnan Uni na New York, mandatario y embahadornan di 170 pais a firma e acuerdo di clima cu na luna di december a wordo cera na Paris. Un acuerdo cu ta drenta na vigor despues cu 55 pais ratifica e acuerdo aki. Na momento cu e 55 paisnan cu hunto ta produci 55% di e emision di gas ratifica e acuerdo, e ta keda oficialisa. A traha hopi tempo y duro pa yega e a acuerdo aki. E mester tin como resultado cu na 2020 lo tin un reduccion grandi di gasnan dañino pa medio ambiente, en particular CO2. E pais y estadonan cu a firma e acuerdo tin e obligacion pa limita keintamento di mundo ta 2%. Un acuerdo historico, cu a haya elogio di organisacionnan grandi cu ta cuida nos medio ambiente manera 'GreenPeace', a wordo firma tambe pa Prome Minister di Aruba Mike Eman representando henter Reino Hulandes den esaki.

Despues di e acto di firmamento di e acuerdo di clima, unda por a mira secretario di Estado Mericano John Kerry firma cu su nieta di mas chikito riba su scochi, simbolisando e generacion cu ta bin, Prome Minister di Aruba Eman a bisa di ta sinti su mes orguyoso di por a participa na un asunto asina importante y sigur tambe di por a haci esaki den nomber di henter Reino Hulandes. Aparte di e acuerdo di clima a discuti tambe e 17 metanan di desaroyo sostenibel. "Den e sesion general di Nacionnan Uni nos a presenta nos vision. Tambe por a constata con e metanan cu a wordo poni pa wordo realisa pa e siguiente decadanan pa crea un miho calidad di bida pa ciudadanonan di Aruba y rond mundo, mescos tambe proteccion di nos medio ambiente pa sigura cu e siguiente generacion hereda un mundo unda nan por bida den trankilidad y siguridad, ta metanan halto riba agenda di gobierno di Aruba."

E 17 'Metanan pa Desaroyo Sostenibel' (SDG) di 'United Nations Development Programme' (UNDP) cu a keda acorda unda tur pais mester busca forma con contibui na nan, tabata un topico tambe. Entre nan metanan manera combatimento di probresa, miho educacion, miho trabou, percura pa nos medio ambiente riba tera y lama. "E temanan aki nos a pone ya algun tempo caba halto riba agenda na Aruba. Sostenibilidad ta un tereno cu Aruba ta trahando duro riba dje. Con e pais ta crece economicamente y e ciudadano tin un bon calidad di bida. Nos a haci esaki cu introduccion di un 'reparatietoeslag' pa esnan di menos recurso, tambe a introduci sosten finananciero pa esnan cu no tin trabou, un seguro medico pa henter e poblacion, esnan cu tin un salario minimo a haya un ahustacion, tur hende tin acceso na un bon educacion di nivel halto y universitario." E temanan di SDG ta importante y ta hayando hopi atencion na Aruba. Na Aruba a cambia e pensamento tambe cu no simplemente ta crece economicamente, pero acopla e crecemento aki na un miho calidad di bida pa tur hende. Pesey mes tambe gobierno a inverti asina tanto den proyectonan cu ta na bienestar di e poblacion. "Ultimamente Nacionnan Uni tabata na Aruba pa sostene gobierno den su procesonan. Pronto Nacionnan Uni ta habri un Centro di Excelencia na Aruba. "Esaki hustamente pasobra cu Nacionnan Uni ta mira cu Aruba ta dunando hopi atencion na e temanan cu nan a scoge pa implementa."

Expresionnan haci den e articulo aki no necesariamente ta refleha opinion di ArenaPoliti.co