ORANJESTAD – Hopi a puntra di con Juan David Yrausquin a bolbe cu AVP y e Gobernacion di e partido berde lidera pa Prome Minister Mike Eman despues di su renuncia como Minister di Finanza. Pero pa e hoben politico y Prome Minister Eman esaki no tin nada straño den dje. Ambos ta entusiasma cu su regreso. E hoben politico a bisa cu e ta prefera mira loke ta uni otro enbes di loke ta dividi otro.

Esaki a wordo treci dilanti den un conferencia di prensa na Cas di Partido AVP unda cu e lider di partido y alabes Prome Minister a anuncia cu Juan David Yrausquin ta e candidato pa bira e siguiente Minister Plenipotenciario di Aruba na Hulanda.

Despues di a tuma retiro como Minister di Finanza, Juan David Yrausquin a sigui cu su estudio avansa den Ciencia Politica na New York, cual e ta finalisando. E hecho cu e ta acepta e puesto di Minister Plenipotenciario no ta afecta su estudio. El a splica cu ta e mes a acerca Prome Minister Eman den e periodo di deliberacionnan cu tabatin pa nombramento di un Gobernador nobo pa Aruba y e conflicto cu a surgi a base di esaki. “Na e momento ey mi a acerca Prome Minister cu mi deseo ta pa aporta na un conclusion exitoso di e periodo di Gobernacion di Gabinete Mike Eman II. Particularmente pa loke ta e relacionnan den Reino y e retonan y oportunidadnan cu tin den e parti aki.”

El a splica cu den e temporada cu e tabata studiando den exterior el a realisa cu na final di dia tin hopi mas cu “ta uni nos di locual ta dividi nos". Particularmente pa locual ta trata partido AVP, e principionan Cristian Democrata di e partido, e integridad di nos Prome Minister y e deseo di su persona pa crea oportunidad igual pa cada persona cu ta biba riba e pais aki, ta punto- y metanan cu ami ta uni mi mes cu ne y cu pa mi na final di dia ta surpasa cualkier diferencia di opinion cu por tin riba diferente maneho den Gobernacion,” Yrausquin a bisa. El a bisa cu por scoge pa enfoca riba loke ta dividi nan y gasta hopi tempo na energia den e partinan aki, of por scoge pa enfoca riba locual ta “uni nos” y asina traha conhuntamente pa sigura e bienestar general di e pais y su hendenan, y alabes traha conhuntamente riba e metanan poni den eleccion 2013. “Ami a scoge pa e ultimo aki y den e cuadro ey traha estrechamente cu Prome Minister y otro coleganan, fraccion y partido p’asina consolida e esfuersonan grandi cu a wordo haci ultimo añanan pa fortifica finanza y economia di Aruba. Mi lo traha estrechamente cu tur mi coleganan pa crea miho entendimento den Reino.”

Tambe a bini dilanti den su combersacion cu Prome Minister Eman e agenda pa hiba e relacionnan den Reino na un otro nivel, na bienestar di ambos banda.

Expresionnan haci den e articulo aki no necesariamente ta refleha opinion di ArenaPoliti.co