Prome Minister Mike Eman "Juancho, bon bini" 

ORANJESTAD - Den oranan di dialuna mainta den Sala di Conseho di Partido AVP na Playa Prome Minister Eman rondona pa miembronan di fraccion di AVP den Parlamento y coleganan minister a anuncia re-entrada di Juan David Yrausquin den partido y na mes momento su candidatura pa bira Minister Plenipotenciario na Hulanda. E ambiente tabata perfecto ya cu partido a brasa e futuro minister cu sigur no ta un desconoci den su seno. E anuncio di Eman a bay acompaña pa aplauso grandi di esnan presente. Despues di un friccion cu Hulanda Yrausquin, kende tabata Minister di Finanza, a bandona su puesto di minister y partido algun tempo atras, pero a regresa como un homber mas experiencia cu hopi gana di sigui cumpli cu programa di partido.

Prome Minister Eman: "Algun aña pasa e personahe bon conoci den comunidad Juan David Yrausquin cu hopi curashi a tuma e decision pa drenta politica. Cu esaki el a duna ehempel na hoben profesionalnan cu servicio publico ta algo hopi importante banda di tur otro carera cu nos por tin den nos bida. Sirbi bo pueblo y sirbi bo pais ta cosnan grandi, pasobra loke bo haci den e funcion ey tin impacto riba nos calidad di bida, calidad di enseñansa, di nos salud, di nos futuro y con hiba Aruba cada bes na etapanan nobo di progreso." Eman a sigui splica pa cu por cumpli cu esaki, bo tin mester di e talentonan mas grandi di bo pais, hendenan integro cu ta pone pueblo y pais na prome luga. "Awe nos ta akinan y e momentonan aki ta yena mi cu orguyo y satisfaccion pa por bisa cu durante e ultimo dianan aki mi por a hiba combersacionnan cu sr. Yrausquin, partido tambe tabatin combersacionnan cu ne, mescos tambe ex coleganan y hunto a yega na e decision importante cu Juan David Yrausquin ta regresa den su partido AVP y ta duna su talento y servicio - despues di a amplia su conocemento cu estudionan na Merca - na disposicion di su pais, su pueblo y su partido. No por tin momento mas bunita cu esun aki pa yam'e bon bini den su cas, den su partido y su pais." Eman a continua bisando cu Yrausquin ta bira e siguiente Minister Plenipotenciario na Hulanda. Esaki a keda acorda den Conseho di Partido, den fraccion di AVP den Staten y den Conseho di Minister. Eman: "Nos ta spera cu den e dianan aki e proceso cu tin cu cana pa por yega na e nombracion oficial, ta keda cla. E ora ta sigui su huramentacion y e por bay Hulanda pa tuma e encargo aki riba dje." Eman a finalisa bisando 'Juancho, bon bini."

Expresionnan haci den e articulo aki no necesariamente ta refleha opinion di ArenaPoliti.co