Awe 7 di februari 2017 ta un dia grandi pa Aruba, ya cu ta cumpli un aña mas di bida nos lider honorario sr. Nelson Oduber. Un persona cu den trayectoria di su bida a eherce un gran cantidad di funcion importante, tanto den gobierno como den Parlamento di Aruba y tambe pa 25 aña como lider di MEP. Y tur esaki cu gran responsabilidad y den forma ehemplar na beneficio di nos comunidad.
Nel a wordo acerca pa promer vez na 1975 pa subi lista di nos prestigioso partido MEP (nr. 23) y ya den su prome salida el a haya sosten considerabel di e pueblo votador.

Nel como diputado: Na 1975 Nel a bira Diputado y a keda den e funcion aki te cu 1985. Como diputado Nel a desplega trabaonan importante pa nos pueblo, manera introduccion di nos himno, bandera, ortografia etimologico, institucion di Arubus N.V., Aruba Ports Authority N.V., proyecto di containerhaven, fondo di pensioen pa e trahadornan di haf, edificio di Biblioteca Nacional, edificio di Domeinbeheer, Hotelvakschool Bushiri, construccion di oficinanan auxiliar di gobierno, Plan Sasaki, Coordinador pa Status Aparte, etc. Sin duda cu Nel Oduber como man drechi di nos Libertador a lucha schouder cu schouder cu Betico Croes pa logra e Status Aparte entrante 1 di januari 1986.

Nel como lider di MEP: Desde 31 di december 1985 – despues di e accidente tragico di nos Libertador - Nel a bira lider interino di MEP y dia 8 di maart 1987 el a ser eligi como lider di nos partido. El a ser re-eligi na 1991, 1995, 2000, 2005 y 2009 como e unico lider politico cu desde 1986 a ser eligi den un forma democratico den un Congreso. Desde cu Nel a tuma e partido over di cual MEP tabatin 8 asiento na 1985, el a percura pa MEP a logra 10 asiento na 1989, unda cu pa un paar di voto mas MEP lo a logra 11 asiento. Bao di liderazgo di Nel den e eleccionnan cu a sigui na 1993, 1994, 1997, 2001, 2005 y 2009 partido MEP nunca a baha bao di 8 asiento, locual ta un logro grandi, pasobra tur partido na Antiyas y Aruba di cual nan lider fundador a fayece a bay atras den voto y hopi di nan te hasta a caba na nada. Sinembargo Nel a demostra su energia y capacidad y a lidera MEP triunfantemente pa 25 aña largo y te hasta a implanta un record electoral, caminda den e eleccion di 2001, MEP como e prome partido politico den Reino Hulandes a saca un mayoria absoluto den un eleccion como pais, esta 12 asiento.

Nel como Ministro Presidente: Na 4 ocasion Nel tabata Ministro Presidente di pais Aruba, esta na 1989-1993, 1993-1994, 2001-2005 y 2005-2009. Como Ministro Presidente Nel a percura pa logronan grandi pa Aruba, manera entre otro e reapertura di e refineria Coastal, e traspaso di e terenonan den Seroe Colorado, firmamento cu SACE pa soluciona e problema di e garantianan hotelero reduciendo e debe aki cu 100 miyon dollar, firmamento di TIEA y US Customs and Preclearance cu Merca, Placa di Plant N.V., Parke di Molina na Vader Piet, e prome y unico hotel di 5 strea Ritz Carlton. Pa evita falsificacion di historia estatal, mester enfatisa cu un di e logronan mas grandi di Nel tabata e scrapmento di e fecha di Independencia 1996 for di den Statuut, pero cu Aruba ta mantene e derecho di autodeterminacion, esta cu nos pueblo lo dicidi ki dia nos lo kier bira independiente. Alavez Nel a percura pa independisa e companianan estatal y converti nan den N.V.-nan: WEB N.V. y Setar N.V. Tambe el a percura pa Setar cumpra Tele Aruba N.V. y Cable N.V. Tambe el a firma contract pa compra di e compania di electricidad Elmar. Un gran cantidad di logronan laboral tambe ta riba nomber di Nel Oduber: separacion di entradanan di pareha casa, arbeiders y werksters a haya status di ambtenaar, pago igual pa trabao igual etc.
Den su calidad di Ministro Presidente, Nelson Oduber a bishita y topa cu varios dignatario internacional, manera e.o. Presidente di Brasil Lula, Presidente di Chile Bachelet, Presidente di Colombia Uribe, e lider di Union Sovietico Gorbachov, Obispo Desmond Tutu, Papa Juan Pablo 2 etc.
Integridad y honestidad di Nel: Den historia di politica Arubano nos lider honorario Nelson Oduber semper a wordo admira pa su integridad y honestidad. Nel ta un homber corecto, decente y cu un curashi y determinacion cu ta dificil pa iguala. Su espirito di lucha y su dedicacion ehemplar na su condicion fisico ta haci cu Nel ta mustra cada dia mas hoben y awe un y tur ta contento di mira Nel cumpli su di 70 aña. Cu nos Creador drama su bendicion riba nos lider honorario y pa e por cumpli hopi aña mas, yen di salud, dicha y felicidad rondona pa su sernan queri.
“Nel, partido MEP y pueblo Arubano ta orguyoso di tur bo logronan pa pais Aruba. Danki y mas danki”. 

Expresionnan haci den e articulo aki no necesariamente ta refleha opinion di ArenaPoliti.co