Ministerio di Sector Primario: Banda di importa fruta y berdura di Republica Dominicana, Minister Oduber a enfoca riba e metanan pa aumenta produccion local cu 15% na 2020
Minister di Sector Primario Otmar Oduber a bin Aruba cu noticianan sumamente positivo for di Republica Dominicana pa loke ta trata agricultura.
Manera Minister Oduber a splica lo cuminsa entrante mei un proyecto piloto di tres luna, pa importa fruta y berdura pa consumo di comunidad Arubiano.
Esaki lo wordo haci a traves di Santa Rosa caminda lo haci uso di e mercadonan cu nan tin pa brinda comunidad e oportunidad pa por obtene fruta y berdura manera antes tabata tine na nos waf chikito.
Aki por pensa hasta pa por ehempel bay den barionan pa asina aki demostra e comerciantenan cu tabatey y importadornan di Aruba cu ta interesa pa tuma esaki over cu e meta cu e mester significa un reduccion den prijsnan . Ta pa e motibo aki mes e programa piloto aki lo ta uno benificioco pa e comerciantenan local.
Mirando e impacto di calidad cu nan ta pone peso riba dje y e rekisitonan cu ta wordo poni riba dje pa Merca y Europa ta casi sigur cu Republica Dominicana por garantiza Aruba cu e lo por tin berdura y frutanan fresco na un prijs rasonabel y brinda e oportunidad na comunidad completo pa asina biba mas saludabel y yuda baha gastonan tambe. Esaki sigur lo ta na beneficio di e local como tambe pa e hotelnan cu ta consumi asina hopi pa cu nan guestnan akinan na Aruba.
E motibo pa e sosten di Gobierno pa esaki ta pa mustra cu e prijsnan por wordo reduci y laga espacio habri pa e comerciante interesa pa haci uso di esaki, mirando cu Gobierno no tey pa haci negoshi,pero e tey si pa trece oportunidadnan.
E mandatario ta kere cu una bes cu bo por haya for di e mes un destinacion mas importadornan di Aruba cu ta importa fruta y berdura esey mes lo regula e competencia y yuda baha e prijs.
Pa loke ta trata e productornan local e mandatario a sigura cu esaki no lo kita ningun estimulio pa cu e cunukeronan local, al contrario e produccion local tabata e topico principal pa loke ta trata e encuentronan na Santo Domingo.
‘Nos a mustra riba e hecho cu Aruba tin menos di 1% cu ta wordo produci localmente y hopi biaha loke ta wordo produci no ta yega na comunidad y ta wordo cumpra dor di restaurantnannan y comunidad mes no ta haya e oportunidad pa disfruta di esaki cu ta sigur un producto hopi mas saludabel.
Den e cuadro aki Minister Oduber a indica cu su meta ta y lo sigui ta pa promove cultivo local. Diferente acuerdonan y proyectonan pa yuda nos agricultornan local pa reduci nan costonan. Pero na e momentonan aki e produccion local no ta suficiente pa por abastace e demanda existente y ta necesario pa sigui importa y na Republica Dominicana a haya e calidad, cantidad y consistencia cu nos isla mester.
E meta cu Gobierno a pone ta cu pa 2020 lo kier logra yega un produccion local di entre 15-20% y a papie na Republica Dominicana y Aruba por conta cu nan sosten pa Sector Primario.
Expresionnan haci den e articulo aki no necesariamente ta refleha opinion di ArenaPoliti.co