Gabinete ME II: Ademas di mehoracion den infrastructura, Seroe Patrishi ta haya atencion social tambe
Servicio Comunidad y Bicindario/BoBario
ORANJESTAD – Diahuebs mainta tabatin otro sesion di Accion di Bario, actividad den cual Prome Minister di Aruba, Mike Eman, ta bishita e habitantenan pa combersa directamente cu nan y trece mehoracionnan. E siman aki a toca turno na e compleho di cas di FCCA na Seroe Patrishi. Aki funcionarionan di Servicio pa Comunidad y Bisindario, conoci como BoBario, a papia riba e diferente posibilidadnan cu tin pa mehora e situacion social di e comunidad.
Seroe Patrishi ta un bario cu varios aña di existencia y cu ta forma pa un mescla di poblacion, segun Ruth Tromp Schoop. “E ta un di e prome barionan cu Gobierno a scoge na comienso di su maneho pa haci renobacion di bario; e ta un ehempel hunto cu Yuwana Morto. Bo ta ripara cu e infrastructura ta hopi mas agradabel,” asina Tromp-Schoop a comenta.
E y su ekipo a scoge Seroe Patrishi pa tende con e resultado di e renobacion ta y di otro banda kico ainda falta y con gobierno por yuda of intermedia na FCCA pa yuda e habitantenan. Un ehempel chikito di algo cu a haya sa pa medio di e bishita di ayera, ta cu hendenan mester cana basta te caminda grandi pa coy bus. “Nan ta pidi pa haya un bushalte mas cerca di cas. Esey ta e tipo di cosnan cu nos ta purba di duna un man pa haci e calidad di bida e habitantenan mas agradabel,” tabata palabra di e funcionario.
E plan di compleho di cas na Seroe Patrishi a inclui un cancha di basket. Sin embargo, den practica e facilidad no ta wordo uza. Raoul Gravenstijn, kende tambe ta forma parti di Servicio pa Comunidad y Bisindario, a splica cu entre hoben, FCCA y Gobierno ta bay wak con hunto por bin na un convenio caminda ta mantene e facilidad pa bisiñanan di Seroe Patrishi, pero haciendo algun cambio. Un parti principal pa futbol cu ta loke e hobennan di bario ta gusta mas. Tambe ta bay pone bankinan caminda mayornan por bin sinta wak e muchanan hunga.
“Nos ta lucha pa e parti social haya su contenido. Nos a concentra hopi riba e prome fase di infrastructura, pero bo no por laga e parti social un banda; esey ta e parti cu ainda falta y nos ta logrando!” Gravenstijn a finalisa bisando.
Expresionnan haci den e articulo aki no necesariamente ta refleha opinion di ArenaPoliti.co