Mocion di MEP pa protehe pueblo MESTER wordo respeta

ORANJESTAD – “Pakiko ta pueblo atrobe mester paga e cuenta di problema entre banconan y gobierno?” ta pregunta di Lider di MEP Evelyn Wever-Croes.

Ta conosi cu Banco Central su gastonan a aumenta hopi ultimo anja, y gobierno ta pone hopi presion pa saca mas ganashi di Banco Central pa asina por cubri e MEGA DEBE cu Gabinete Mike Eman a ocasiona. Pa por cumpli cu su gastonan, y pa sigi paga dividendo na gobierno, Banco Central a bin cu e ley di “koersmarge vergoeding”. Na november 2014 e ley a wordo trata y e tempo ey caba e fracción di MEP tabata tin su dudanan cu si e banconan lo bai cobra nan cliente si of no.

“Pero e minister tabata enfatico, cu nan a delibera caba cu e banconan comercial y e intencion ta cu no lo cobra e clientenan. A pesar cu e minister a mustra masha determina, y a pesar cu nos a confía su palabra, toch pa tur seguridad nos a presenta un mocion pa evita cu ta pueblo mester paga esaki. E mocion aki a wordo sosteni unanimamente pa henter parlamento. Pesey awor ta totalmente inaceptable cu toch ta bai cobra pueblo e tax nobo aki. Mi por tin comprensión pa e banconan comercial, mi por tin comprension pa Banco Central, pero mi no por acepta cu ta pueblo mester bai paga atroba pa un problema entre e banconan y gobierno. Gobierno a duna nos su palabra cu pueblo lo no ta esun c uta bai paga, awel cumpli awor.

Tur e problema aki ta wordo ocasiona pa e mal maneho financiero di gabinete Mike Eman. Si Mike Eman y su ministernan no a malgasta tanto placa, no a redobla nos debe nacional, awe nos pueblo no ta para dilanti e problema aki. Pesey e problema mester wordo soluciona pa esnan cu a ocasion’e, y no pa e pueblo di Aruba. Nos no ta acepta esaki y nos lo yama gobierno den Parlamento pa pon’e respeta e decision di Parlamento”, Evelyn Wever-Croes a bisa. 

Expresionnan haci den e articulo aki no necesariamente ta refleha opinion di ArenaPoliti.co