Den varios medio di comunicacion por a tuma nota recientemente cu gremionan comercial ATIA, Camara di Comercio y asociacion di banconan “ABA” a reacciona asombra y decepciona riba e introduccion di e asina yama ley di “Exchange Rate Margin Compenation”, esta e belasting riba cambio di divisa cu gobierno a introduci desde 1 di april 2015.

Banda di e hecho cu e belasting aki por tin consecuencia desastroso pa comercio, ta un carga administrativo pisa pa e institucionnan bancario. E forma den cual e ley aki a pasa a cay tur gremio di sorpresa y tabata manera un baño di awa friu. Segun ATIA y Camara di Comercio no tabata tin consulta di parti di gobierno cu e stakeholders riba e punto aki. E gobierno actual semper a pronkia di ta haci uzo di consenso por medio di un dialogo social pa tuma decisionan dificil. Ta obvio cu den e proceso pa intruduccion di e ley aki, algo a bay completamente robes. Mas leu ainda e asociacion di banco ta agrega cu na ningun momento nan a acorda cu Minister Bermudez pa absorba e gastonan di e belasting, mientras cu e Minister encuestion ta bisa cu e banconan a sigur’e cu nan no lo pasa e cobransa pa Pueblo.

Hecho ta cu e ley NO ta impidi e banconan local pa pasa e cobransa pa Pueblo! Es decir cu si di berdad e intencion di gobierno desde un inicio tabata pa no pasa e cobransa riba Pueblo, nan lo mester a pone esaki CLA y RASPA den e ley. Pero esaki no ta e caso. Banda di esaki ta di cuestiona cu Banco Central ta bisa cu su gastonan operacional a subi y su entrada a baha pero di su banda gobierno a saca 17 miyon florin na dividendo den aña 2011 y 2012. Si berdaderamente Banco Central su situacion financiero tabata den deterioro, dicon no a scoge tog pa paga dividendo?

Pero den tur esaki, e falta di respet di mas grandi ta cu gobierno a ignora e mocion acepta unanimamente den Parlamento na November 2014, caminda a urgi gobierno pa percura pa e belasting riba divisa no bira un otro carga adicional pa Pueblo. Gobierno a scoge pa ignora e mocion aki completamente y no a menciona esaki den ley manera parlamento a pidi’e.

E punto cardinal den henter e proceso aki ta e falta di transparencia di e gobierno actual. Segun Besaril esaki ta precisamente e motibo dicon den su tempo como presidente di sindicato SPA a dicidi di bandona mesa di dialogo social. E gobierno actual a haci uzo di e instrumento di dialogo social pa suta Pueblo cu medida. Un bon ehempel pa e 1% di BAZV cu a bira adicional na e BBO. Ya di e tempo ey caba e gobierno a firma un cantidad di protocol cu gremionan sindical y comercial pero na momento di ehecuta e acuerdonan di e protocol ta scoge solamente algun punto cu ta cumbini gobierno so!

E falta di transparencia aki ta precisamente e motibo pa cual e dialogo social a fracasa. Un pa un e gremionan a bandona e mesa di dialogo social y awo cu gobierno no tin e instrumento aki mas pa suta Pueblo cu medida, e ta sigui hacie mane un "SNIPER cu un SILENCER" den su man! E ta un hecho cu nos Fraccion ta condena e practica severamente pa motibo cu na final nos Pueblo Merce Miho!

Expresionnan haci den e articulo aki no necesariamente ta refleha opinion di ArenaPoliti.co