Nos a tuma nota di e declaracionnan den prensa di e Vice Presidente di Parlamento, sr Dammers, riba e accidente di trafico den cual su persona y un dienstwagen di Parlamento tabata envolvi. Di locual nos por a lesa nos por conclui cu e forma con sr Dammers a trata cu e dienstwagen accidenta ta inaceptabel.

No tin rapport di Polis
Ora cu un danio wordo haci na priopiedad di Pueblo of na un propiedad cu ta wordo paga cu placa di Pueblo mester tin un rapport di un instancia oficial di Gobierno di Aruba cu ta relata e danio y e motibo pa cual e danio a presenta. Den e caso aki cu ta trata di un accidente di trafico ta mas cu claro cu Polis encarga cu trafico ta wordo yama pa un rapport oficial di e accidente wordo traha. For di e declaracion den prensa di sr,. Dammers, ela indica cu e no a yama Polis y a dicidi riba su mes pa tackle e auto y hibe su cas. E modo di proceder aki ta inacpetabel. Ya cu e dienstwagen cu ta wordo paga cu placa di Pueblo a sufri danio y pa cu esaki mester por a yama Polis pa por haya un declaracion oficial. Cu Dammers mes ta paga e danio no ta relevante, ya cu instancianan manera Algemene Rekenkamer y Centraal Accountantsdienst no por haci nan trabou sin cu nan tin documento oficial riba kiko a pasa cu e dienstwagen cu ta wordo paga cu placa di Pueblo.

Bou influencia
E Vice Presidente di Parlamento a declara cu e tabata cansa ma no tabata burachi. Pero ta remarcabel cu e siman aki ainda nos por tende su collega di Fraccion di AVP ta splica cu ora cu un hende bandona e sitio di accidente, e ta wordo considera di ta bou influencia y ta keda na e persona pa demostra cu no ta asina. En bista di e ponencia aki, nos ta puntra nos mes ta con sr. Dammers ta bay prueba awor cu e no tabata bou influencia di por ehempel alcohol si Polis no a wordo yama pa e por a pasa e test di supla? E siman aki ainda sr Muller di Polis a indica den prensa cu core auto bou influencia di alcohol ta un crimen. Pues si sr. Dammers a core bou di influencia di alcohol esey caba ta un crimen cu mester wordo investiga y tambe wordo cuestiona door di su propio colleganan di partido AVP. Pasobra ta inaceptabel cu ta investiga un cuidadano comun y ta keda sin investiga e Vice Presidente di Parlamento di nos Pais ora e comete un crimen.

Ora tuma retiro por papia di ‘end of story’
Ta masha remarcabel cu sr. Dammers no kier wordo cuestiona den e caso aki y kier djies duna un splicacion breve den prensa yena cu contradiccion pa despues bisa cu esaki ta ‘end of story.’ Pa un Vice Presidente di Parlamento declara esaki ta inaceptabel. Na Hulanda un parlamentario cu haci un eror asina ta tuma honor na su mes y ta tuma su retiro. Pero aki na Aruba e parlamentarionan di AVP ta asina burachi di poder cu nan ta pretende di por para riba ley, keda sin duna splicacion, abusa di fondo publico y bisa bo como Pueblo tambe pa bo keda keto y no cuestiona ya cu nan ta dicidi ki ora ta ‘end of story.’ Ta solamente ora sr. Dammers asumi su responsabilidad pa e eror inaceptabel cu ela haci y tuma su retiro como Vice Presidente di Parlamento y parlamentario di e Pais aki, e ora nos por papia di ‘end of story.’

23 juni 2015

Expresionnan haci den e articulo aki no necesariamente ta refleha opinion di ArenaPoliti.co