Despues di mas cu un anja Raad van State na Hulanda a duna su opinion riba e KB cu gobierno hulandes a duna gobierno di Aruba anja pasa riba e presupuesto. Awe Mike Eman ta celebra victoria y haci comisfuera Hulanda a actua incorrecto. En realidad ora bo lesa e coseho di Raad van State bo ta conclui cu gobierno Hulandes envez di duna Aruba un KB lo mester a duna Aruba un Algemene Maatregel van Rijksbestur cual ta un medida hopi mas peor. Aki ta caminda segun Raad van State cu gobierno hulandes a comete un error. E la aplica e sancion robez. Analisando e conseho bo ta saca e conclusion tambe cu gobierno hulandes a spaar Mike Eman un berguenza mas grandi pasobra si nan a haci uso di e Algemene Maatregel van Rijksbestuur e consequencia pa nos pais lo tawata mucho mas peor. Nan a duna Mike Eman e chance pa corregi su errornan y una vez cu CFT a bira ley, gobierno hulandes a logra su meta.Gobierno di Mike Eman tin e custumber pa desvia atencion y tin e custumber di manipula nos pueblo. Awor no ta e momento mas pa sigui manipula y malinforma. No ta momento mas pa discuti si e KB ta legal of illegal, ta momento pa gobierno splica pueblo kiko mas falta pa bon. Tur hende ta bibando den intercidumbre, comercio no sa mas kiko ta spera nan y pueblo tampoco no ta sa ki medida falta pa bin ainda.
E realidad di nos pais ta papia pa su mes. Nos pais actualmente ta bancarota, e debe di pais Aruba ta riba 4 biyon florin. Esaki ta e motibo principal pakiko gobierno di Mike Eman a wordo poni bao curatela y awe tin supervision financiero. Awe CFT a bira ley  cu esaki MEDIDA tambe a bira ley. Mike Eman kier sigui ganja nos pueblo bisando cu ningun di e consehonan di CFT no ta obligatorio y cu no ta bin medida y cu oposicion ta spanta pueblo. Nos kier enfatisa y recorda nos pueblo cu Mike Eman mes a bai di acuerdo pa introduci 24 medida pa cumpli cu e normaman di e presupuesto di reduci e deficit den un anja di 9.4% pa 3,7%. Tur e medidanan cu tin actualmente a wordo proponi y ta wordo eheccuta pa e gobierno aki ta medidanan pa cumpli cu e norman stipula den e ley di CAFT.  Tur e medidanan ta hinka den e normanan stipula, eynan e veneno pa pueblo ta hinka. Aumento di BBO pa 3.5% ta forma parti di e 24 medidanan. Cobra pueblo 2 florin pa ora, cobra trahadornan 900 florin pa anja pa parkeer den Playa y den area di hotel ta medida number 16 riba e lista di Mike Eman. Anto e ora bo ta puntra bo mes ki credibilidad un gobierno asina ainda aki por tin di keda bisa cu NO ta bin mas medida y cu tur conseho di CFT ta keda na conseho y hunto cu partnernan social lo dicidi ki medida mas lo bin. Ki dia gobierno a tene un dialogo social pa discuti e aumento di BBO. Aki un biaha ta wordo comproba con Mike Eman ta sigui ganja e pueblo aki. Ki dia e por ta sincero cu pueblo y splica e pueblo e disaster cu e la crea y splica e pueblo kiko ta spera nos. Ki dia Mike Eman a bai dialogo social pa papia di e parkeetmetersnan?Ki dia a sinta cu partnernan social y bisanan cu Aruba tin un problema financiero y cu lo mester bin cu medida pa resolve e problemanan aki. E pueblo aki a wordo enganja y keto bai ta wordo manipula cu informacionan pa pinta e situacion bunita pa pueblo. E amargo realidad ta cu pueblo NO por carga mas medida y gobierno ta sigui azota nos pueblo cu medidanan cu ta pisa riba e costo di bida y riba cartera di pueblo!

Expresionnan haci den e articulo aki no necesariamente ta refleha opinion di ArenaPoliti.co