Diabierna dia 18 di september 2015 minister Alex Schwengle a bisa cu hopi "bravour" cu TUR ciudadano cu ta kere cu por tin cosnan straño a of ta pasando den e projecto di "vernieuwbouw" di HOH, por pasa libremente na oficina di SOGA pa haña e oportunidad di analysa e documentonan cu SOGA tin den nan poder y SOGA gustosamente lo coopera cu esaki.
Durante e mes un encuentro aki den parlamento sr. John Hodgson tabata presente, y mi por a nota cu sr.John Hodgson a duna señal cu SOGA ta dispuesto pa haci esaki.

Tres dia despues, dialuna dia 21 di september 2015, UPP a manda un carta pa SOGA cu un peticion pa brinda un delegacion di UPP e oportunidad pa por haci e investigacion aki, asesora cu un of mas experto riba e tereno aki. Copia di e peticion na SOGA ta bay adhunto.

UPP for di mas di 4 aña constantemente tabata haci denuncianan al respect, y ta di spera cu tanto Minister y SOGA cumpli cu loke a ser bisa den Parlamento, y no bay sconde cu tin documentonan cu no por ser duna.
Ya caba UPP ta haciendo preparacionnan pa haci e trabow aki, y ta den conversacion cu un paar di hende cu experencia den tipo di trabownan asina, pa asina cu UPP haya e luz berde for di SOGA, inicia cu e trabow aki.Nos en todo caso no tin confiansa cu e miembronan di e Raad van Toezicht di HOH lo por haci tipo di investigacion asina, na prome lugar pasobra nan no tin e experticio, y na di dos lugar pasobra den e Raad van Toezicht tambe tin miembronan cu ta campañadornan di AVP cu hamas lo por produci un trabow imparcial.

A base di e investigacion aki - y ta di spera si cu nos haya TUR, pero TUR documentonan respecto HENTER e procedura cu a conduci na otorgamento di e proyecto aki na e grupo Arellano - nos lo bay entrega un keho oficial na Ministerio Publico cu e resultado di nos investigacion. Si nos haya tur documentonan oficial y p.e. emailnan, etc. etc., sigur sigur lo tin como resultado cu en berdad actonan coruptivo a tuma lugar. Ningun hende por kere cu nan lo por "get-away" den e caso aki. Tur esnan cu a haci nan mes culpabel na actonan coruptivo, mester carga nan responsabilidad y biba cu e consequencianan cu esaki lo bay trece cune.


Den nomber di Union Patriotico Progresista – U.P.P.
Candelario A. S. D. Wever
Brazil, september 23, 2015

Expresionnan haci den e articulo aki no necesariamente ta refleha opinion di ArenaPoliti.co