Den e reunion di parlamento di dia 18 di september 2015, minister Alex Schwengle a bisa cu e no tin nada di sconde riba e proyecto di expansion/renobacion di HOH, y cu esun cu ta desea esey, por pidi SOGA tur documento, y gustosamente SOGA lo duna "inzage" den tur documento al respecto. 

Pa kita tur duda, nos lo cita loke minister a bisa textualmente den parlamento e dia ey: 

Pues minister tabata hopi enfatico, te hasta a haci mofa; wel, awor ta ora pa pone hechonan na su palabranan: duna instruccion na SOGA pa laga UPP haya "inzage" den tur documento, manera e mes a vocifera den dicho reunion. 

Basa riba e declaracion aki, UPP, dia 21 di september 2015, a manda un carta pa SOGA na unda nos a pidi pa un delegacion di UPP wordo permiti pa haya "inzage" den TUR documento entorno e proyecto di HOH. 

Y awe nos ta mas di 30 dia despues, y ni e decencia SOGA tin pa contesta, corda pa laga nos haya e "inzage" cu e minister cu yen di bravour a priminti. 

 

Den mesun reunion aki e minister balente aki a priminti, cu e lo bin cu un "feitenonderzoek", despues cu su propio fraccion a bise con mediocre ela atende e caso di e cambernan di operacion. 

Aki un biaha mas e minister no ta cumpli cu e mes cu boca grandi a priminti. 

 

Pa UPP, dia pa dia ta bira mas obvio, cu tin hopi corupcion den henter e proyecto aki. 

Si no tin cos di sconde, dicon no ta duna UPP e oportunidad pa haya "inzage" den TUR documento entorno e proyecto aki?? 

Ta kiko a pasa cu e "feitenonderzoek" cu mester a keda cla den 4 siman? 

A bin dilanti cu e.o. Mike Eman, Visser, Infra-Team, SOGA, Schwengle, tur a faya?? 

Of no tin e curashi di yama esnan cu kier culpa, bin declara? Dicon no ta manda yama dr. Boesten y dr. Jaime Falconi pa duna nan version?? Ta miedo di kiko tin? 

Of aki atrobe kier proteha coleganan minister y/o partners in crime, mescos cu a proteha e dos specialistanan cu a comete actonan inapropia cu a costa nos pueblo miles di florin? 

E minister a bisa cu e no tin nada di sconde, y esun cu tin prueba, bay Ministerio Publico; wel, duna UPP "inzage", y nos ta garantisa e minister cu nos lo bay Ministerio Publico, mescos cu nos lo bay Ministerio Publico pa e actonan inapropia di e.o. e dos specialistanan y e medico cu a retira na IMSAN. 

 

Si den un siman nos no haya un invitacion di SOGA pa nos haya e oportunidad pa pasa den e documentonan, no ta keda nos nada otro di publicamente acusa tur esnan involvi den e proyecto, como corupto (met naam en toenaam), cu e speranza cu nan hiba nos corte pa eynan nan habri buki pa nos por wak. 

 

 

Den nomber di Union Patriotico Progresista – U.P.P.

Candelario A. S. D. – Booshi – Wever

Brazil, october 25, 2015