ORANJESTAD – Di un manera humilde, manera Prome Minister Mike Eman mes a describi, ayera merdia Gobierno di Aruba a manda un su mensahe di solidaridad cu pueblo Frances. Personal di Oficina di Gobierno y Oficina di Gabinete di Gobernador a reuni parti merdia pa reflexiona y hunto a tene un minuut di silencio na memoria di e victimanan di e atake terorista cu diabierna anochi a sacudi cayanan di Paris y hunto cu ne, e spirito di mundo henter.

“Un di e cosnan di mas grandi cu generacionnan a lucha ta pa organisa nos sociedadnan den forma mas democratico y liber,” asina Premier Eman a cuminsa na bisa na e esnan presente y para banda di varios di su otro coleganan di Gabinete. E mandatario a continua indicando cu “Den e dianan aki e esencia di e balor universal ey a wordo sacudi.”

E mensahe cu Gobierno di Aruba kier expresa ta cu nos isla ta para banda di un pais cu a conoce un incidente asina tragico pa expresa nos sentimento di condolencia pa esnan cu a perde nan bida y para banda di tur otro cu tambe kier bringa e violencia sin sentido aki.

Net prome cu a cuminsa cu e minuut di silencio, Prome Minister Mike Eman a haci oracion bisando “Cu Nos Creador por duna nos e forsa, Francia y otro paisnan e forsa pa supera e retonan di e momentonan dificil aki.”

Expresionnan haci den e articulo aki no necesariamente ta refleha opinion di ArenaPoliti.co