E siman aki Parlamento di Aruba den un reunion publico lo bay trata e Ley di e Cuenta Anual di Pais Aruba pa 2013. Remarcabel ta cu Gabinete Eman a presenta hunto cu e Ley aki un cambio di ley den cual nan kier pa Parlamento bay di acuerdo pa tapa e fechorianan di Minister Sevinger. E mandatario a gasta 5 miyon mas cu a wordo presupuesta pa trabounan di DOW sin cu a hustifcia e gastonan adelanta y sin cu a percura pa haci e cambionan necesario den e presupuesto di DOW pa 2013. Y awor na 2015 kier maniobra pa tapa e fechoria aki.

Gobierno no a sigi conseho di Raad van Advies
Den su conseho riba e cambio di Ley aki Raad van Advies a indica cu Gabinete Eman no por cambia e Ley di DOW di e manera aki pa por tapa e eror haci pa Minister Sevinger. Ya na januari 2014 caba Raad van Advies a hala atencion di Gobierno bisando cu e cambionan necesario den e presupuesto 2013 di DOW no a wordo haci y cu esaki ta muestra di mal maneho financiero cu ademas tin consecuencia grave pa Minister Sevinger cu ta personalmente responsabel pa tur gasto cu no ta corectamente presupuesta. Pa drecha e eror aki Raad van Advies a conseha pa Gobierno traha un ley den cual ta pidi cooperacion di Parlamento pa indemnisacion di Minister Sevinger pa asina libre di e consecuencianan civil y penal di e 5 miyon cu no a wordo presupuesta debidamente. Pero Gobierno no a haci caso di esaki y no a presenta ningun ley pa drecha e eror y libra Minister Sevinger di su fechoria contra ley.

Minister Sevinger y Gobierno ta actua contra ley
Raad van Advies den su conseho a splica cu e manera cu Gobierno kier haci cambio den e Ley di Cuenta Anual 2013, ta contra ley. E ley di presupuesto su intencion ta pa duna e Minister un autorisacion PROMER cu e gasta e placa. Pero aki e Minister a dal bay gasta 5 miyon via DOW sin cu e placa aki tabata presupuesta riba e presupuesto di DOW pa 2013. Riba dje, ningun caminda a specifica ADELANTA na kiko lo a bay gasta e 5 miyon aki. E manera cu Minister Sevinger a actua aki ta contra ley. Banda di esaki Raad van Advies a indica cu e cambio cu Gobierno kier haci awor den e presupuesto di DOW pa 2013, NO por wordo haci via un cambio di e Ley di Cuenta Anual 2013. Si haci esaki, Gobierno ta actua contra ley.

E mayoria lo apoya e fechoria aki tambe
Asina mes cu Raad van Advies a indica cu e manera di actua aki di Gobierno ta contra nos leynan y a indica pa NO presenta e Ley aki na Parlamento, toch nos por mira cu Presidente di Parlamento a dicidi di yama reunion publico pa trata e Ley aki. Tristo ta cu diahuebs awor e mayoria den Parlamento di Aruba lo bay vota voor y lo yuda tapa e fechoria aki di Minister Sevinger. Di e manera aki lo crea e presedencia cu na Pais Aruba tin un ‘free for all,’ na unda esnan cu ta promer yama pa cumpli cu Ley ta djies trapa riba nos leynan y e mayoria den Parlamento cu mester condena esaki ta djies tapa e fechoria cu e Minister ta haci contra nos leynan.

Xiomara Maduro
16 november 2015

Expresionnan haci den e articulo aki no necesariamente ta refleha opinion di ArenaPoliti.co