Oranjestad: "Na prome luga mi kier a hasi uzo di e oportunidad  pa extende palabranan di sincero condolencia na e famia di e victima cu a fayece despues di e incidente na un club nocturno. E ta un momento dificil, di hopi dolor, pues hopi forsa na e famia den e dianan dificil nan dilanti.

Un caso asina ta dificil pa elabora den contexto politico. Pero awe ta e dia pa para keto y reflexiona riba e maneho di Minister Dowers. Nos tin simanan largo ta bisa e mandatario di Husticia cu e tin cu pone mas atencion riba e aspecto di prevencion. Si a duna e aspecto aki e atencion cu e merece, awe e situacion di eterno criminalidad lo por tabata diferente. Ki dia sr. Dowers ta bai lanta for di soño? Ki dia sr. Dowers ta bin padilanti y cuminsa convivi cu Pueblo?

Awe Aruba su comunidad a lanta den tristesa, den shock y hasta por Papia di miedo. Nos fraccion ta lamenta cu tin un cantidad alarmante di ciudadano den nos comunidad cu tin miedo. Miedo di sali anochi, miedo di bai supermercado of cumpra number despues di 8'or di anochi. Nos hendenan tin miedo hasta di bai lanta placa na bancomatico anochi! No ta pornada tin varios persona cu ta expresa nan mes riba rednan social cu nan ta sinti nan mes prisonero den nan cas, pa motibo cu nan tin miedo di bai sali anto inocentemente topa cu mal ora.

Esaki no ta e Aruba cu nos kier biba aden. Esaki no ta un noticia cu nos kier habri nos siman cune. Incognita grandi ta keda, na ki momento e Minister lo adapta su maneho. Ki dia lo cuminsa proteha y controla nos costanan? Ki dia lo bini bek cu helicopter? Ki dia lo asigna Warda Nos Costa cu tareanan specifico pa cuida nos costanan? Con a para cu Radar y e servicio cu nos ta ricibi for di Kustwacht? Cuanto arma di candela mas mester drenta Aruba prome cu cuminsa actua? Kiko mas mester pasa prome cu cuminsa actua? Con tin pensa di aumenta e siguridad den e area di Hotel?

E ta causa dolor y ta masha lamentabel cu den pleno 2015, den un luna di December cu na Aruba ta suppose di ta un luna di alegria, cu nos Pueblo mester wordo sacudi cu un noticia mane esun di awe. Mi ta uni mi mes na Pueblo su sentimento .... "Hasta Cuando!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co