Siman pasa Parlamento tabata tin un encuentro cu Minister De Meza y e ehecutivonan di WEB y Elmar riba e noticia di 12000 usuario cu tin retraso riba nan cuenta di awa. Hopi pregunta a bin dilanti pa e mandatario y entre nan e asunto di hedging na WEB cu te ainda no a wordo investiga debidamente. For di e contesta di Minister De Meza a bira bisto cu e decicion di hedging pa 2015 y 2016 tabata robes y esaki a perhudica WEB su pocicion financiero. 

A aplasa e contracto di hedging pa 2017 
Minister De Meza a splica cu no por deshaci di e contracto di hedging ya cu huristanan a splica cu lo tin repercucion grandi si kibra e contract. Locual a haci pa alivia e situacion ta cu mitar di e contract di hedging pa 2015 a wordo aplasa pa 2017. Pues, den 2015 lo tuma mitar di locual a contrata pa tuma na bari di fuel oil na un prijs di 90 dollar y despues den 2017 lo tuma e otro parti. Haciendo esaki WEB ta scapa di tin cu paga 90 dollar pa bari pa mitar aña largo y locual a logra spaar, a yuda WEB financieramente den 2015.

Prijs di crudo ta baha pero nos ta keda paga 90 dollar
WEB por a logra scapa gasto di hedging pa mitar di 2015. Pero esaki no ta kita afor cu keto bay den 2016 y mitar 2017 WEB mester bay paga 90 dollar siendo cu prijs di crudo ya caba ta na 30 dollar riba mercado mundial. Cu un diferencia asina grandi den prijs no por bisa nada otro cu e contracto di hedging tabata un decicion robes. E hedging aki a perhudica WEB su pocicion financiero y riba dje e mal decicion di hedging aki ta pone cu Pueblo no por conoce un rebaho den prijs di awa y tampoco coriente y esaki ta perhudica e cartera di nos Pueblo malamente.

Mester investiga y responsabilisa tur cu a tuma e decicion pa hedge na WEB
Nos ta keda ripiti. E asunto di hedging aki na WEB mester wordo investiga debidamente. E eror cometi ta uno grandi ya cu a perhudica WEB su pocicion financiero y a perhudica Pueblo su cartera. Si no a hedge, awe Pueblo lo por a conoce un rebaho substancial di prijs di awa y coriente y no mester tabata tin e noticia di 12000 usuario di WEB cu no por paga nan cuenta di awa. Pesey no por keda sin investiga e decicionnan tuma pa esnan cu a y ta forma parti di Board di Supervicion di WEB. Mester investiga e decicionnan tuma na Utilities NV y mas cu claro MESTER investiga y responsabilisa Ministernan Eman y De Meza pa e crimen aki cu nan a haci perhudicando WEB y e Pueblo di Aruba.


7 december 2015

Expresionnan haci den e articulo aki no necesariamente ta refleha opinion di ArenaPoliti.co