Durante e reunion publico pa trata e Presupuesto Suppletorio 2015 di Pais Aruba nos por a experencia un otro abuso di poder di Presidente di Parlamento na un unda ela recuri pa saca mi persona como parlamentario di opocicion di Pais Aruba for di Sala di Parlamento haciendo uso di e man duro di Polis. Esaki ta otro prueba cu Presidente di Parlamento ta malusa e poder cu e stul ta dune pa asina purba stroba y silencia opocicion. Pero e mundo aki ta lora y poder lo caba. E Presidente di Parlamento por a sacami afor pero e no por silencia e voz cu ta rezona pa bisa e berdad.

Tildami di grosero 
E motibo pa cual segun e Presidente di Parlamento e mester a recuri na saca mi persona for di e reunion di Parlamento ta pasobra cu mi persona lo tabata grosero. Esaki ta un motibo hopi zwak cu e Presidente a recuri na dje, ya cu mi persona no a usa ningun palabra malo den su direccion y tampoco den direccion di ningun hende presente den Parlamento. Alcontrario, mi a trece e berdad dilanti cu kizas Minister Dowers, Minister Eman of e Presidente di Parlamento no kier a tende. Pasobra ora Minister Dowers ta bin tilda nos Lider Evelyne y nos fraccion di gañado, ta na su lugar pa corda e mandatario aki cu e unico gañado den e Sala di Parlamento ta Minister Mike Eman. Si bisa e berdad aki ta groseria, anto ‘so be it.’ Mihor nos wordo tilda di ta grosero bisando e berdad, cu ta traidor di e Pueblo aki tapando e berdad.

No por silencia e voz cu ta bisa e berdad
Ta remarcabel cu henter e reunion bo ta haya esnan di AVP ta abusa di e parlamentarionan di opocicion, pero contra nan e Presidente di Parlamento ta usa man cu handschoen di felpa. Asina cu toca turno na opocicion Presidente di Parlamento su manera di midi y interpreta ta cambia. E biaha aki e Presidente hasta a bay asina lew pa recuri na uso di e man duro di Polis pa saca parlamentario di opocicion pafor di Sala di Parlamento, sin cu e tin un motibo valido pa recuri na tal extremo. No ta palabra malo mi a papia, no ta insulto mi a lansa y no ta bringa mi a bringa. Ta e berdad mi a bisa. Con cu bay bin, e Presidente por wel di sacami afor, pero e NO por silencia e voz cu ta rezona pa bisa e berdad.

Un dama para den su sapato
Ta bisto cu Presidente di Parlamento a recuri na e extremo aki pa asina mustra cu e tin e poder pa lastra su contrincante cu ayudo di e man duro di Polis. Pero e Presidente a lubida cu un dama para den su sapato tin e firmesa pa cana riba su propio forza y no mester wordo escolta y tampoco wordo saca pa ningun Polis. Nos ta spera cu e Presidente a tuma bon nota di esey y nos ta corde cu e mundo ta lora y e poder lo caba un dia.


18 december 2015

Expresionnan haci den e articulo aki no necesariamente ta refleha opinion di ArenaPoliti.co