Evita repeticion innecesario! 

Un di e proposicionnan pa e forma di trata e presupuesto e aña aki, ta cu ta duna cada  fraccion un cantidad di tempo pa tratamento di e presupuesto. Di e forma aki cada fraccion ta bira responsabel pa e reparticion di e tempo bou di e miembronan di e fraccion. Di e forma aki ta trata di reduci e chens cu miembro di e mes un fraccion pa haci e mes un preguntanan, of trata e mes un temanan bez tras bez. E repeticion innecesario aki ta un di e motibonan cu e reunionnan ta tarda asina hopi. Door di pone e responsabilidad pa parti e tempo serca e fraccion mes, ta haci tambe cu e coordinacion, palabracion, reparticion di tema of ministerio entre e miembronan di un fraccion, ta bira miho. Rene Herde': "Den e fraccion di AVP nos tin hopi aña caba ta reparti e tema y ministerionan entre e miembronan di e fraccion. Di e forma aki nos a crea voceronan pa cada tema of ministerio. Nan ta atende e tema of ministerio henter aña. Tambe ora di trata e presupuesto. Nos tin hopi aña caba ta evita cu tur 12 miembro di nos fraccion ta papia riba tur tema. Di e forma aki nos ta spaar hopi tempo den cada reunion, sin perde nada di loke nos kier trece dilanti, pasobra tur miembro di fraccion cu tin algo di contribui na un tema of debate, ta haci esey via un of dos miembro cu ta atende e tema. Esaki ta hopi mas eficiente cu si tur 12 miembro bay papia di tur tema." Door di traha cu un of dos miembro di e fraccion cu ta papia den nomber di henter e fraccion e tratamento di cualkier tema ta bay mas eficiente, y hopi mas al caso. Rene Herde': "Nos no tin tempo pa perde. Den e tempo cu nos tin, nos ta sigura cu tur e puntonan importante di e fraccion riba e tema, ta bin dilanti den forma cla y consiso."


Den e dianan aki e fraccion di AVP ta reuni den su propio seno, ta busca informacion adicional pa haci analisis mas extenso di e presupuesto. For di e analysis nan aki ta sali proposicionnan di e fraccion con pa mehora e maneho di gobierno. Den e reunionnan esaki ta resulta den mocion of amiendanan, pa stimula un desaroyo desea of pa cambia e maneho poni den e presupuesto. E fraccion di AVP for di 2009 ta e fraccion cu mas a cambia e maneho di su propio gobierno, door di trece cambio via amiendanan den Parlamento. Esaki ta duna refleho di un fraccion cu ta sostene e maneho di e gobierno, pero den un forma critico y cu den reunion publico ta cambia e maneho ora ta necesario, manera ta Parlamento so por haci segun ley. E aña aki no lo ta diferente.

Expresionnan haci den e articulo aki no necesariamente ta refleha opinion di ArenaPoliti.co