Den e presupuesto 2016 bo por lesa cu despues di 3 aña porfin Gabinete Eman ta admiti su incapacidad pa cumpli cu norma financiero cu e mes a propone. Ta asina cu na aña 2013 e ministernan di Gabinete Eman a firma un acuerdo jama "Balanced budget akkoord" cual tawata un acuerdo pa logra tin un maneho financiero sostenibel den futuro. E obhetivo principal tawata pa gradualmente baha e deficit y trata na yega na un surplus na aña 2018. E norma cu a aplica den e BBA aki tawata encera un plafond di gastonan di 1.350 biyon y un base di entrada 1.150 biyon pa aña. Segun e documentacion di presupuesto 2016 gobierno ta conclui cu despues di su evaluacion hasi cu e sistematica di BBA lo ta demasiado complica pa por monitorea durante aña. Pero e berdad ta keda cu Gabinete Eman nunca tawatin e disciplina propio pa hiba un maneho financiero responsabel ni cu cuadro financiero di otro tampoco nan propio plan.

Ocasionan cu no a cumpli cu BBA

E promer ehempel tawata e presupuesto 2014 cual na promer instante a mustra un total di gasto di 1.343 biyon pero despues a resulta cu a bin un ahustacion di 209 miyon florin den presupuesto 2014 hasiendo e total na gastonan bira 1.552 biyon! (surpasando e norma). Como sifuera ta poco Gabinete Eman no a logra realisa e meta di 1.150 biyon na entrada tampoco. Mester enfatisa ni e presupuesto original ni esun supletorio no tawata cumpli cu BBA.

Ora di trata e presupuesto 2015 na comienso Raad van advies a constata cu e sistematica ta wordo kibra cu algun di e medidanan. Realidad ta cu cierto medida no ta genera entrada pa gobierno y tampoco ta crea e efecto di "spaar" riba gastonan gubernamental cual ta nifica cu automaticamente esaki ta bai contra di e sistematica di balanced budget akkoord. Ademas di esaki RVA por a conclui for di cifranan preliminar di presupuesto 2015 cu ya caba ta surpasando e maximo di 1.350 biyon na gasto. Finalmente e presupuesto supletorio 2015 trata na december ultimo atrobe gobierno a pasa su limite di gasto cu 12.3 miyon florin ( total na gasto 1.362 biyon).

Ta ignora normanan di ley CAFT

Aparte di keda sin cumpli cu nan propio acuerdo di BBA tampoco a cumpli cu normanan di deficit maximo. Den ley di CAFT tin normanan maximo pa e deficitnan di aña 2015-2018. Pa 2015 esaki mester ta maximo 3.7% pero segun e evaluacion hasi pa CAFT di e presupuesto supletorio esaki ta wordo surpasa y yega te na 4.5%!

Aña 2016 tampoco ta un sorpresa pasobra cifranan presenta ta irrealistico. Den e presupuesto 2016 ta premirando entrada di belastingnan demasiado halto y un crecemento economico exagera segun CAFT! Esaki kiermeen cu Gabinete Eman lo no ta cumpliendo cu e deficit maximo di 2.0% pero ta viola esaki cu un 2.9%!

Pueblo por conclui...
Pueblo por conclui a base di e informacion ariba menciona cu Gabinete Eman tin 2 aña tras di otro cu nunca a cumpli cu propio balanced budget akkoord pero tampoco e ley CAFT. Nan ta propone solucion pero ora di yega pa cumpli cu esaki ta desvia totalmente di e meta. Esaki no ta un sorpresa si teniendo cuenta cu hasta ley y reglanan presupuestario a wordo kibra desde comienso di gobernacion di Gabinete Eman. Pueblo por ta sigur cu un gobierno cu no por logra di mantene su mes na su propio reglanan no ta uno di confia!

Expresionnan haci den e articulo aki no necesariamente ta refleha opinion di ArenaPoliti.co