E debate publico riba e ley proponinpa regula e crecemento di hotelnan "all inclusive" di berdad ta parse di ta bay for di man. Ta di lamenta cu organisacionnan grandi di nos pais a haya bon di purba spanta hende, intimida hende y otro companianan, influencia opinion publico cu un campaña nunca bisto y yena cu informacion cuestionabel. Den e buscamento di argumento e organisacion importante di hotelnan ta kere di a haya un argumento mas. Awor e ley mes lo ta inconstitucional y si gobierno kita e derecho di doñonan pa haci kico cu nan kier cu nan permiso pa opera un hotel, esaki lo nifica segun nan, cu gobierno ta bira dictador y lo kita mas derecho di pueblo. Un argumento sin base y puramente pa spanta hende! 

CONSTITUCION 
Constitucionndi Aruba, mescos cu majoria di constitucion na mundo ta reconoce y proteha e derecho di uso e propiedad cu un hende tin. Pero e mes un constitucion ta bisa explicitamente, cu gobierno tin e derecho di fiha limitacionnan pa e uso di e propiedad den interes general. Gobierno por haci esey pa medio di leynan.(Articulo I.19 inciso 1 di Constitucion di Aruba.) E interes general den e caso di e ley pa introduci un sistema pa regula e crecemento di hotelnan "all inclusive", ta entre otro cu mester proteha e interes economico di resto di nos pais y sigura cu e hotelnan "all inclusive" no stroba resto di restaurantnan, importadornan, taxistanan, tour operators, negoshinan, y tur nan trahadornan, di participa y saca beneficio di turismo. Ta e interes general aki ta loke e doñonan di hotel no kier papia didje y no kier reconoce. Awor ta hasta purba spanta parlamentarionan y pueblo cu e ley lo ta inconstitucional.

Conseho Consultativo (Raad van Advies) a studia e ley extensamente y a duna su veredicto riba e ley. Niun caminda den su analisis y conseho Conseho Consultativo ta bisa algo di cu e ley lo ta inconstitucional. Anto esaki ta e prome pregunta cu Conseho Consultativo ta haci cu cada ley cu pone su dilanti pa analisa y conseha riba dje.

RESPONSABEL
Na mas cu un ocasion caba e doñonan di hotelnan ta bisa cu lo pone gobierno responsabel pa cualkier daño cu nan sufri door di e ley. Tambe nan ta bisa cu e ley aki lo spanta inversionista. Ta increibel cu doñonan di hotel cu a disfruta di e hospitalidad grandi di nos isla, cu a haya algun di e  areanan mas bunita di nos isla pa haci nan negoshi, cu a haci bon negoshi bou di e nomber di Aruba, ta purba spanta pueblo y stroba Parlamento di Aruba pa haci su trabou den interes di henter nos pais. Pa loke ta e daño y e responsabilidad pa esaki, mester puntra e doñonan di e hotel si nan ta para responsabel pa e daño grandi cu un cantidad excesivo di hotelnan "all inclusive" lo causa henter nos economia y nos pais? Manera a sosode na Mallorca por ehempel. Nan ta para responsabel pa e perdida di entrada di e restaurantnan, taxistanan, importadornan, companianan cu ta duna servicio, comercio y pa trahadornan? A caso ta e hotelnan cu kier bira "all inclusive" so tin derecho? Ta nan so tin derecho di usa e bunitesa y rikesa di nos isla pa haci negoshi? A caso resto di Aruba tin cu guli su derechonan y accepta cu ta e derecho di e hotelnan "all inclusive" so ta conta? Cu e nivel di argumento y tacticanan di spanta hende aki, sigur nos no ta yega na un acuerdo. Aruba semper a tene cuenta cu interes di cada persona y grupo. No tin niun intencion di cambia esey tampoco. Pero tur hende mester compronde y accepta si cu INTERES GENERAL SEMPER TA BAY RIBA INTERES INDIVIDUAL OF DI UN GRUPO!

Expresionnan haci den e articulo aki no necesariamente ta refleha opinion di ArenaPoliti.co