Durante conferencia di prensa semanal di Partido MEP, Parlamentario sr. Guillfred Besaril a elabora riba un reunion cu a tuma lugar Diamars ultimo den sala di Parlamento. Sr. Besaril a declara lo siguiente: 

"Diamars ultimo gobierno di Aruba por medio di e titularnan di Husticia y Finanzas a bin Staten c’un proposicion di cambio den e ley cu ta regla e Fondo pa Combatimento di Criminalidad. Na aña 2012 a trata y introduci e ordenansa en cuestion. Den esencia e ordenansa aki ta permiti Husticia haci uzo di  placa, material y propiedadnan procedente di actividadnan delictivo (contra ley) cu keda confisca. Por lo menos esaki tabata e intencion. Den practica a resulta cu en bes di loke wordo genera bay na disposicion di Husticia y combatimento di criminalidad, esaki tabata termina den e caha general di gobierno. Pa colmo mester a warda te na momento di trata un presupuesto pa haña parti di e fondo y no e suma total. 

P'esey a bin Parlamento pa haci e cambionan necesario den e ordenansa pa realmente Husticia por haci uzo efectivo di e fondo. Ademas a introduci un cambio cu ta permiti e Minister di Husticia haci uzo di inmediato di e fondo, pero a condiciona e cambio aki na e echo cu na final di cada kwartaal e Minister mester bin Staten y responsabilisa su mes pa e uzo di e fondo. Asina Parlamento por keda vigila e uzo di e fondo. Partido MEP semper a bay di acuerdo cu iniciativanan cu ta positivo pa nos comunidad y e biaha aki no tabata diferente. Specialmente en bista di e situacion reinante riba nos isla pa motibo di criminalidad y e falta di siguridad.

Loke si a keda un preocupacion pa nos fraccion ta e echo cu e uzo di e fondo lo keda den man di un mandatario kende cu pa motibo di su maneho eratico y reactivo, nos fraccion na dos ocasion a entrega un mocion di desconfiansa contra su persona. Nos ta preocupa cu Aruba su siguridad sigui den e rumbo actual. Un rumbo cu nos fraccion ta compara igual na purba mop un vloer di cas pero cu e cranchi awa hancho habri of mane mi grandinan tabata bisa "Hiba awa pa lama!"

Partido MEP ta spera di mira movecion den e direccion di reintroduci e servicio di Helicopter. Nos kier e uzo di tecnologia pa preveni y combati criminalidad, p'esey nos ta kere den e proyecto "Boton di Panico". Pueblo di Aruba kier sinti e presencia di autoridad riba caya. No solamente pa control di trafico sino ademas pa un control mas intensivo di Aruba su costanan. MEP kier mira mas sosode na nivel di prevencion paso e no por tapa solo c'un dede. Circulacion di arma di candela ta alarmante, pues mester preveni esaki drenta na e manera facil cu e ta drentando awor! MEP kier mira porfin cu ta cuminsa convivi cu e preocupacionnan cu ta reina den nos comunidad. Pueblo ta fada y no ta riha na exigi mas pa nan trankilidad!", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co