Durante e presentacion di CFT na Universidad di Aruba riba e situacion financiero di nos Pais, Professor Bakker di CFT a indica cu e debe di Aruba ta esun di mas halto den Reino Hulandes y tambe un di esnan mas halto den Caribe. Sr. Bakker a splica cu despues di e ‘double dip’ cu nos Pais a pasa aden, e crisis financiero mundial na 2008, 2009 y e ciere di Valero na 2012, nos por a spera cu e debe di nos Pais lo a subi. Sinembargo e debe di nos Pais a subi extremadamente hopi. Motibo pa cual a splica cu no ta solamente e factornan externo (crisis financiero y ciere di Valero), pero factornan interno tambe a hunga un rol grandi cu e debe di nos Pais a crece di e forma abnormal aki.

Debe ta na 80 cent di cada florin
CFT a informa cu e debe di Aruba a subi barbaramente den e ultimo añanan. Na 2008 ainda e debe tabata na 40 cent di cada florin, cual ta cumpli cu e normanan di un debe manehabel pa un economia manera esun di Aruba. Pero despues di 2011, e debe a keda bira grandi y ta hasta a pasa e debe cu Hulanda tin y ta hopi mas halto cu e debenan di Corsow y Sint Maarten. Den Caribe tambe Aruba ta briya cu un debe halto y ta figura banda di St. Kids&Nevis, Jamiaca y Barbados cu tin debe haltisimo.

Factor interno cu a pone debe subi
CFT a mustra cu e debe di Aruba a subi grandemente debi na e maneho financiero di Gabinete Eman den 2009 pa 2014, den cual a subi tur e gastonan di gobernacion den un forma excesivo. Principalmente e gastonan di personal a subi grandemente, mas personal a wordo tuma den servicio cu un salario mas halto y cu mas beneficio. E gastonan di pago di interes riba fianza cu Gobierno ta haci tambe a bira dobel y ta pone cu e debe a subi aun mas. Na inversion mes Gabinete Eman no a gasta placa ya cu nan a inverti menos di 60 miyon cada aña, siendo cu nan a presta mas di 1000 miyon florin riba mercado internacional. Banda di esaki Gabinete Eman no a inverti den proyectonan cu ta crea cupo di trabou duradero cu ta logra na pone nos economia lora y yuda e caha di gobierno. Esaki a pone cu mas placa mester a wordo fia y mas grandi e debe a bira.

Mester bay bek na un nivel saludabel di debe
Na final di e presentacion CFT a recomenda pa Gabinete Eman corta den e gastonan di gobernacion. Ta tempo pa trece e debe bek na un nivel saludabel pa nos Pais. E nivel aki segun estudio haci pa IMF ta na 40% di nos GDP, pues ora di cada florin, 40 cent ta bay pa paga debe. Remarcabel ta cu esaki ta e nivel di debe cu nos Pais a conoce tempo cu Gabinete Oduber tabata na mando. Di e manera aki atrobe un instancia independiente ta desenmascara Gabinete Eman su engaño cu nan a hereda un destaster financiero. E maneho di Gabinete Oduber tabata uno responsabel cu tabata cumpli cu normanan di un finanzas publico manehabel. Pero awor Gabinete Eman su mal gobernacion a pone cu Aruba tin e debe di mas halto den Reino y un di esnan mas halto den Caribe.

3 maart 2015

Expresionnan haci den e articulo aki no necesariamente ta refleha opinion di ArenaPoliti.co