ORANJESTAD – E atardi di 4 di Mei 2015, net prome cu solo a baha, a conmemora e di 70 aña di fin di e di Dos Guera Mundial y esaki a tuma luga na e Monumento di Guera riba Adriaan Laclé Boulevard. E acto di comemoracion tabata inclui ponemento di krans, declamacion di poesia, oracion y tambe un discurso conmovedor di Prome Minister Mike Eman.

E mandatario a enfoca riba loke ta necesario pa evita conflicto di tur tipo na mundo y evita mas dolor. Premier Eman a recorda e Arubiano Boy Ecury como un di esnan cu a duna e maximo sacrificio na nomber di paz y libertad; mescos cu tur otro cu a bay pa defende humanidad y nos paisnan.

Tempo di e Di Dos Guera Mundial, pueblonan no tabatin un miho contesta pa e sentimentonan di descontento, sentimentonan pa opresion y diferencia di opinion. “Ta pesey ta asina importante, riba un dia manera awe, puntra nos mes si awe si nos tin un bon contesta riba e sentimentonan ey,” asina Minister President a bisa. E sentimentonan negativo aki tey keto bay y e reaccion mas intuitivo di e ser humano ta pa halsa contra tur loke nan ta experiencia como inhusto.

“Nos tin awe un contesta? Nos tin awe un miho manera pa anda cu e sentimentonan aki?” Premier Eman a puntra contestando su tras: “Si nos tin’e; lamentablemente nos no ta acudi na dje lo suficiente; e ta amor pa prohimo.”  Dialogo y tolerancia ta e miho alternativa y un miho posicion pa desaroya ora cu ta anda cu descontento na mundo.

E ceremonia organisa pa Comision Dienst Dodenherdenking & Plechtigheden ta tuma luga na e monumento di 4 di mei ubica na Adriaan Lacle Boulevard. E ta dirigi pa presencia di Su Excelencia Gobernador Fredis Refunjol y e aña aki a conta cu participacion di Minister di Asuntonan di Exterior di Hulanda, Bert Koenders cu tabata di bishita na Aruba.

Den un serie di pregunta general, e mandatario a señala cu no tin mester di ataca otro of trece daño na paisnan ora tin un diferencia di opinion. El a bisa ademas cu “Si nos ta stima nos rumannan lo suficiente, si nos por construi brugnan riba e diferencianan, si nos por alivia e sentimentonan di dolor cu palabranan di sanacion y solucionnan; e ora ey nos ta yega na miho resultadonan pa e conflictonan cu tin na mundo.”

Pa conclui su mensahe, Minister President Mike Eman a pidi Dios pa inspira nos cu amor pa prohimo, como e solucion pa e sentimentonan scur y wanta nos leu di violencia y maldad. “Cu Dios inspira nos tur cu e sentimento di amor pa nos prohimo riba e mundo aki.”

E discurso di Prome Minister tabata den presencia di un grupo di veteranonan Arubiano di e Di Dos Guera Mundial, cu dichosamente ainda ta na bida. E ceremonia cu ta inclui un defile y saludo di parti di miembronan di Cuerpo di Marina Hulandes a keda marca e biaha aki cu ponemento di 70 flor blauw dor di mucha y hobennan di nos isla, pa marca asina e 70 aniversario di e fin di guera.

Expresionnan haci den e articulo aki no necesariamente ta refleha opinion di ArenaPoliti.co