ORANJESTAD – Prome Minister Mike Eman den un discurso teni na e conferencia maritimo y logistico, a papia riba e desaroyonan cu ta tumando luga relaciona cu e wafnan di Aruba. El a menciona e acuerdo recien cu Port of Amsterdam, pero tambe esun entre STC Holding BV di Hulanda y Universidad di Aruba pa duna cursonan na nivel di Bachelor. Esaki a tuma luga durante un “Maritime & Logistic Conference” na Radisson Resort.

E joint venture entre STC Holding BV y Universidad di Aruba a bini na e miho momento, Prome Minister Eman a bisa e publico presente, ora cu Rey Willem-Alexander y Reina Máxima tabata di bishita na Aruba pa e evento di Sail. “Esaki ta testimonio di e importancia cu Reino Hulandes ta duna na desaroyo di waf na Aruba, Hulanda y rond mundo.”

Tambe el a duna un breve historia con e situacion di waf di Aruba tabata antes – un pier unda barconan chikito cu ta trece mercancia pa e isla ta mara – te ora cu despues di un lucha largo Aruba a haya su propio waf. Un lucha, el a splica, pasobra tur decision tabata wordo tuma na Corsou. Gobernantenan eynan no tabata mira e necesidad pa construi un otro waf mas na Aruba. Pero tambe e procesonan cu a sigui, incluso e acuerdo recientemente firma cu Port of Amsterdam pa desaroya strategianan y maneho pa Aruba tin un waf bon conecta. Esaki, e mandatario a splica, ta importante pa e metanan mas grandi pa desaroyo di e pais y e ciudad.

Awendia a crea un sistema pa bini cu un waf di carga na Barcadera y un pa bapornan turistico na Playa. Principalmente pa e containerhaven e cambio aki ta importante ya cu debi na e limitacion di espacio nan no por a sigui crece. “E dos wafnan nobo aki ta bay duna Aruba hopi bon chens pa ta bon conecta cu mundo.” Eman a bisa cu e conexion cu mundo, nan ta mira, como un posicion importante pa Aruba pa bira e hub entre Europa y Caribe y Latino America.

Na final el a priminti cu Aruba lo traha cu otro wafnan di mundo pa desaroyo di e area aki, principalmente pa haci mas uzo di dje creando un miho futuro pa tur e ciudadanonan.

SCT ta un combinacion strategico mundial di bon educacion, training, estudio, sosten, consultancy y servicio di implementacion pa henter e cadena di nabegacion, waf, transporte y logistica, mescos tambe pa tur loke tin di haber cu e industria petrolero y kimico cu ta relata cu waf. STC ta organisa training y educacion riba tur nivel, di profesional te cu nivel di master. Universidad di Aruba ta brinda programanan riba nivel di bachelor y master y tambe training riba varios tereno relata cu e programanan aki y ta capacita pa brinda estudio, proyectonan y consultancy. E duracion di e trainingnan ta varia entre 1 pa 3 siman. E intencion ta pa start cu e prome training na luna di juni-july 2015.

E acuerdo di e joint venture a wordo firma pa Albert Bos, director di STC Group Holding BV y Glenn Thode, rector di Universidad di Aruba, Prome Minister di Aruba Mike Eman y director di Directie Scheepvaart Carlyle de Coteau. 

Expresionnan haci den e articulo aki no necesariamente ta refleha opinion di ArenaPoliti.co