AVP ta sigui persigui mi, pero hamas y nunca ami lo bandona politica [avia di AVP! Pakico nan kier core cu mi di politica? Ami, un juffrouw di scol, un mama soltera? Ami ta un peliger pa nan, pasobra mi ta critoio? Nan no sa ainda, cu ami no ta laga ningun hende stop mi di logra mi destino? Solamente Dios todopoderoso por dicidi si mi mester hala for di e caminda politico!

Awor Parlamentario Melvin Tromp ta bisa cu ami no ta presenta na mi trabou? Sigun ami, ta AVP no kier pa e muchanan, nan mayornan y coleganan haya oportunidad pa cera conoce cu mi. Pa ami por wak e disaster cu nan ta haci den enseñansa. AVP den e persona di Arthur Dowers lo ta esun cu a duna opdracht pa no duna mi un scol pa mi traha desde augustus 2013? Ami no sa.  Hecho ta cu mi no a haci nada malo na pia di trabou, pa mi wordo pon'i riba non actief. Hecho ta cu ami mes a busca trabou y a haya esaki na oktober 2013 caba, na Colegio Arubano. Hecho ta cu na april, mei y juni 2014, Parlamentario Chris Romero a bay bek na Filomena Mavo, pa duna les na e muchanan, pasobra supuestamente no tawata tin maestro pa Scheikunde! Hecho ta cu Minister Hooyboer Winklaar ta preferi pa hende sin diploma duna les di scheikunde. Hecho ta cu Michelle Hooyboer Winklaar ta scohe pensionadonan prome cu e ta scohe un maestra cu 21 aña di experiencia di duna les. Hecho ta, cu ora cu mi a wordo confronta cu un otro aña 'di 'non-actief', cu ami mes a dicidi pa laga algo bon sali di un situacion malo y p'esey mi a cuminsa studia ley na Universidad di Aruba. 

Mi ta gusta mi trabou di juffrouw y cu of sin un scol, ami ta sigui desaroya mi mes como professional. Aunque AVP ta persigui mi y perhudica mi na tur sorto di manera. Como tur otro maestro y maestra na Aruba, mi entrada no a subi desde cu mi a yega na e edad di 38 aña, pero e costo di bida si ta sigui subi! Riba dje, mi entrada a hasta baha door cu mi no tin overuren mas. Kere mi, como mama soltera cu un Yiu cu ta studia, esey ta dal duro. Y ainda falta pa mi haya milles di florin di SIAD bek, cual e proceso aki, mi sa sigur, cu AVP tambe ta stroba. Kizas nan a kere cu mi lo bandona politica of bandona MEP ora cu nan a cuminsa bully mi? Al contrario. Nan por persigui mi, pest mi, bully mi, trapa riba mi derechonan humano, pero ami no ta bay stop di lucha pa un mihor Aruba, pa un mihor enseñansa.

Luna pasa mi a bolbe manda un carta pa SKOA. Ami no ta manera Minister Michelle Hooyboer Winklaar, mi a follow up, si e hefe di personal a ricibi mi carta. Mi ta wardando pa haya un contesta. Den e carta mi a splica, cu aunque cu mi estudio di Ley na Universidad ta bayendo bon, mi ta sinti falta di e muchanan y mi colega maestronan. Awor e ta keda na Minister Michelle Hooyboer-Winklaar mes, pa stop di mete den asuntonan di personal di SKOA, pa stop di intimida e directivanan di scol y asina malgasta placa di pueblo. Melvin Tromp mester a questiona e Minister na mando di su partido, enbes di puntra MEP cu no tin nada di haci cu e asunto aki. Melvin Tromp, mester a haci su trabou como Parlamentario y busca informacion, enbes di acusa hende manera un 'kip zonder kop', cu ta inventa storia. E mester a questiona Minister Hooyboer Winklaar, pakico e no a sigui cu e nieuwe functie beschrijving y bezoldiging pa e maestronan? Cu Minister Hooyboer ta hayele necesario pa menciona, cu e tin apenas 18 luna como Minister di Enseñansa, ta prueba, cu den AVP no tin profesionalidad pa por Traha a base di un 'meerjaren plan', ni si e plan ta di su mesun coleganan di partido.   

Tanten cu AVP no laga mi traha, mi lo sigui studia Ley. Asina, si un dia AVP ta bolbe ataca mi persona, mi lo por defende mi mes mihor ainda of, si pueblo vota pa mi representa nan den Parlamento, mi lo ta prepara pa e reto aki. Ami si no ta laga ningun Minister, ningun partido politico y ningun bully manera Melvin Tromp, hinca mi den un skina y cera mi boca pavia di miedo! Mas biaha AVP subi mi lomba, mas hancho e lo bira! Pueblo di Aruba merece hopi mas mihor, cu e disaster cu e Gobierno di Mike Eman I y II a haci. AVP mester stop di haci abuso di poder, stop di schors, acusa y pest juffrouw di scol. Mihor Gobierno Eman baha na awa, pa pueblo por vota pa un Gobierno cu SI lo goberna na bienestar di pueblo. Hamas y nunca AVP lo core cu mi di politica! Danki na e sosten incondicional di partido MEP, danki na tur esnan cu si conoce mi y ta sostene mi, danki na mi yiunan y demas famia, mi ta sigui cu e lucha sagrado aki. Enbez di baha cabez pa e Gobierno aki, pueblo mester exigi pa e Gobierno aki baha. Esun cu a causa e problema, no por forma parti di e solucion. Nos tur merece mihor! 

Expresionnan haci den e articulo aki no necesariamente ta refleha opinion di ArenaPoliti.co