Gabinete ME II: Prome Minister a bolbe Sabana Basora diahuebs ultimo pa controla avance di e trabounan cu a keda priminti
![Mike Sabana Basora](/images/779x490/Mike-Sabana-Basora.jpg)
ORANJESTAD - Durante un bishita di tres siman pasa na Sabana Basora, Prome Minister Eman a priminti di laga departamentonan concerni, Serlimar y DOW, limpia un pasada cu tin entre dos fila di cas na e compleho di FCCA na Sabana Basora. Di e forma aki ta trece mas siguridad den e bario y ta crea un espacio tras di cada cas cu por wordo uza pa plantacion, di matanan di fruta of berdura. Prome Minister Eman a bishita e area aki diahuebs mainta pa mira cu e trabou di limpiesa ta basta avansa y a topa cu habitantenan contento cu a gradici’e pa cumpli cu su promesa.
“Mi ta hopi contento di mira cu e trabou di limpiesa ta avansando, despues cu nos a bishita e bario algun siman pasa, combersando cu e habitantenan.” Na e ocasion ey, e mandatario a señala, tabatin hopi tema cu a wordo discuti, entre otro aspecto di siguridad y otronan relata na siguridad. Un di e preocupacionnan cu tabatin ta un area di e bario cu pa hopi tempo no a haya mantencion. Ta trata di un pasada entre dos fila di compleho di cas, unda matanan a crece tur den otro pero tambe e area a absorba un cantidad grandi di sushi. E mandatario a bisa cu e habitantenan no solamente a considera e area uno a-hygienico pero tambe cu e no ta contribui na siguridad di e ciudadanonan cu ta biba rond. “E limpiesa ta trece claridad, ta habri e area. Bisiñanan a keda hopi contento cu no solamente nos a scucha y wak, pero nos a cumpli tambe. Awe nos a mira cu e trabounan ta avansando.”
SERLIMAR a wordo pidi pa haci un area di mas cu 100 meter, cu a trece e siguridad bek pa e habitantenan. Alabes tin preparacionnan andando pa e futbolistanan profesional cu ta forma parti di Team BoBario organisa actividadnan semanalmente riba e veld chikito cu ta forma parti di e compleho di vivienda di FCCA.
“Pa nos ta importante cu e trabounan ta wordo haci ora cu nos bishita un bario. Na momento cu nos cumpli, nos ta sinti tambe cu e ciudadanonan ta haya mas animo pa tuma un responsabilidad di nan banda.” Den e caso di e limpiesa cu SERLIMAR ta haciendo, e habitantenan a segura cu e area ta bay keda manteni limpi pa nan mes di awo en padilanti.
“Nos ta contento di mira cu e luga ta birando limpi .... cu awor nos por sinti un poco mas di siguridad,” un Oscar Marin hopi contento a expresa su mes na Prome Minister y a bisa cu awor ta momento pa cuminsa cu algun plantacion den e area aki di Sabana Basora.
Expresionnan haci den e articulo aki no necesariamente ta refleha opinion di ArenaPoliti.co