A inventarisa deseo, sugerencianan di bisiñanan y anuncia cu programa Luz den Bario ta cuminsa den juli 

ORANJESTAD – Prome Minister tabata di bishita diahuebs mainta den bario di Savaneta cu ta un di e barionan cu Prome Minister Mike Eman a bishita algun ocasion caba den e ultimo dos añanan, debi na e peticionnan cu ta drenta pa esaki.

E area unda Prome Minister Eman a cana tabata Savaneta Nort y a wordo compaña pa sr. Robby Wever, personanan bon conoci di e bario pero tambe di e sector di comercio.

Na e varios casnan bishita, por a sinti cu en general tin aprecio pa e trabou cu ta wordo haci door di Prome Minister Eman y e Gobierno cu e ta lidera. Tin hopi aprecio pa e hecho cu e ta cana den e barionan di Aruba, cu ta wordo mira como un bon forma pa scucha e elogionan pero tambe e criticanan, cual ta sirbi pa mira cual ta e cambionan cu mester wordo haci den maneho stipula door di su Gabinete.

Prome Minister Eman den Accion di Bario di e siman aki na e area nort di Savaneta a wordo compaña pa Robby Wever, miembro di un famia conoci pa nan trayectoria den e sector di negoshi di panaderia. Pero tambe a forma parti di e inicio di e epoca industrial cu un machine shop na Barcadera. “Ta masha importante cu personanan cu a hunga un rol asina prominente den desaroyo di nos pais of di nan bario, ta forma parti di e Accion di Bario cu nos ta organisa,” Prome Minister Eman a expresa.

A haci un inventario di loke ta e deseo di e bario, den tur e areanan, unda cu loke a resalta tabata deseo pa bini cu sistema pa reduci velocidad di trafico mientras cu den e area nort e peticionnan ta concentra mas riba asfalt y miho iluminacion. P'esey tabata cu orguyo e mandatario a anuncia cu den luna di juli awor ta cuminsa cu e programa di Luz den Bario ora cu ta bay introduci e luznan LED nobo.

Riba peticion di Prome Minister, e Bus di Salud tabata presente pa yuda habitantenan y e mandatario a wordo compaña den su bishita den e bario pa funcionarionan di Serlimar, DOW y Gele Koorts Muskieten Bestrijding (GKMB). Hopi di e casnan bishita a pidi e funcionarionan di GKMB pa haci e testnan necesario den awanan para pa mira si ta topa cu e sangura cu ta causa Dengue of Chikinguya. Funcionarionan di SERLIMAR ta den e barionan durante henter un siman, principalmente pa haci limpiesa y corta matanan cu ta stroba trafico banda di caminda grandi. “Di e forma aki nos ta percura pa siguridad den trafico den bario wordo mehora,” Eman a indica.

Savaneta ta un bario hopi desaroya, y e poco deseo cu e habitantenan tin ta mas iluminacion y camindanan di santo cu nan ta desea pa wordo asfalta.

E mandatario a logra bishita e negoshi Cuts & Curves, un gym masha popular den e area di pariba di brug, unda cu el a haya un recorido den e instalacion moderno y hasta a haya chens pa test algun di e aparatonan y alabes a haya conseho y tips con pa mantene e curpa fit, apesar di e schedule druk como mandatario.

Prome Minister Eman a cuminsa cu su Accion di Bario practicamente na inicio di e prome Gobierno cu el a lidera na 2009 y e caminatanan aki a bira masha popular cerca e pueblo cu pa prome biaha ta experencia cu un lider politico despues cu e drenta Gobierno ta biba asina cerca di pueblo y ta scucha nan preocupacionnan. 

Expresionnan haci den e articulo aki no necesariamente ta refleha opinion di ArenaPoliti.co