E MOU ta pa logra miho cooperacion entre e islanan 

ORANJESTAD – Minister di Salud Publico di Hulanda drs. Edith Schippers, den su discurso na apertura di e prome Health Care Conference den Renaissance Convention Center a papia di loke Hulanda ta haciendo riba tereno di Salubridad Publico, unda kier sigui brinda servicio pero cu control di gastonan.

“No kere cu aki ta trata di un otro macamba cu ta bin bisa boso kico boso mester haci. Awe mi ta simplemente conta boso kico nos ta haciendo na Hulanda y kizas boso lo keda sorprendi ya cu cosnan ta parecido na otro na hopi parti di mundo,” Minister Schippers a trece dilanti.

Un preocupacion cu el a señala cu tin na Hulanda y cu a wordo papia di dje na Aruba tambe, e crecemento den e cantidad di hendenan di edad halto. “Cu e grupo aki ta bira cada mas grandi ta bon. Nos ta inverti hopi placa den estudionan, pero nan ta bira grandi cu malesanan cronico. El a bisa tambe cu hopi biaha e grandinan ta sufri di mas cu un malesa cronico, cu ta parecido na e situacion di Aruba cu ta diabetes.”

E grupo di personanan di edad cu malesa cronico ta personanan cu mester di un otro tipo di cuido cu antes. El a mustra cu pa e tipo di malesa aki, cuido na cas ta hopi importante. Awendia tecnologia ta permiti pa haci hopi cos cu antes no tabata posibel. Esaki ta encera cu mester logra un cuido fuerte den prome linea cerca dokternan di cas, fysioterapista y enfermeronan, ya cu nan ta e promenan cerca di e pashentnan aki. “E prome linea compleho aki mester ta hopi bon concentra riba bon cuido cu ta disponibel. E prome linea na Hulanda ta hopi fuerte segun standardnan internacional pa cual hopi biaha nos ta ricibi elogio, pero nos no ta ainda unda cu nos kier ta.”

Hulanda kier haci su prome linea mas fuerte ainda y den casonan di cuido hopi compleho kier scoge un otro direccion, y den esaki ta masha crucial cu no ta tur cos ta wordo haci na hospitalnan. Por ehempel, si mester haci un tratamento oncologico cu ta algun biaha pa aña so y cu ta hopi compleho, nunca por recoge suficiente experiencia, nunca por tin un team prepara cu realmente por haci operacionnan compleho. Cu demasiado poco pashent bo no por inverti den aparatonan medico cu ta necesario pa realisa operacionnan complica pa logra un final feliz. Pesey Hulanda ta trahando riba dos aspecto, reinforsa e cuido cerca di cas y concentra riba cuido complica mas leu di cas. “E hendenan lo no worry pa core bay un tiki mas leu, sigur si nan por haya e siguransa cu den dos aña di tempo por baha e cantidad di mortonan den operacion complica di cancer cu un kwart parti. Tambe pasobra e cuido despues di operacion ta mas cerca di cas.“ Schippers a bisa tambe cu ta dificil pasobra ningun hospital kier entrega nan specialisacion y tabatin discusionnan fuerte riba esaki, pero poco-poco ta logrando yega na haci “loke nos ta bon den dje y laga e otro pa nos bisiña cu ta bon den otro cos”.

Minister a splica tambe cu e pashentnan den e parti Caribense di Reino ta masha importante p’e, pesey prome cu el a bini e conferencia na Aruba, el a bishita e clinicanan na Medellin, unda ta manda mayoria pashent, pa mira con nan servicio ta. Tambe el a papia cu algun pashent.

A haci un evaluacion hopi grandi di diferente aspecto prome cu a tuma e decision pa manda pashentnan di cierto tipo di malesa pa e clinicanan na Colombia. El a sigura cu ta prefera cu nan lo por a wordo manda Corsou y Aruba. El a sigura cu nan ta prefera pa manda nan pashentnan pa e dos islanan aki. Na momento cu e calidad di cuido ta na ordo, tin suficiente capacidad pa trata e pashentnan, sigur lo evalua pa laga e tratamentonan tuma luga aki banda mes. Ta esaki ta loke e Ministernan di Salud di e partinan di Reino Hulandes a reuni riba dje durante e prome dia di e conferencia. Tur cos ta concentra riba calidad y cooperacion. Pesey mester tin concentracion y specialisacion. “Si tur hende haci tur cos, nunca bo ta yega na e nivel desea.”  Pa logra e specialisacion mester tin cooperacion y esey ta para den e MOU cu a wordo firma riba e prome dia di Health Care Conference Aruba. “Hunto nos ta fuerte”, Schippers a bisa na final di su discurso.

Expresionnan haci den e articulo aki no necesariamente ta refleha opinion di ArenaPoliti.co