Minister Otmar Oduber a ricibi un presentacion amplio di Ministerio di Turismo di Cuba 

Minister Otmar Oduber a reuni diamars na Cuba cu Vice Minister di Turismo Alexis Trujillo Morejon y e delegacion di consehero di dicho ministerio. Riba agenda di reunion diplomatico tabatin un encuentro entre Minister Oduber y su homologo na Cuba, pero lamentablemente debi na un accident di e minister Cubano, e mes no por tabata presente y a encarga su prome Vice Minister pa reuni cu nos Minister di Turismo.

E mandatario a ricibi un presentacion amplio, detayando e caracteristicanan di e vision di e Ministerio di Turismo di Cuba. A inicia cu un splicacion distinguiendo e dos etapanan di turismo na Cuba. E turismo prome cu revolucion di 1959, cu tabata enfoca riba un turismo exclusivo y procedente di mas tanto e mercado Norte Americano. Despues di esaki cosnan a cambia drasticamente. E di dos etapa di turismo pa Cuba a conoce hopi reto pero awor ta creciendo rapidamente cu mercadonan diversifica. Pa Cuba e mercado mas importante ta esun di Canada, pero Cuba tin un mercado grandi di China y tambe Europa. Kier continua e mercadonan aki pero tambe amplia den e mercadonan di Latino America, Amercia Central y Europa, particularmente Polonia.

Den nan mercadeo nan no kier enfoca riba ciudadnan specifico manera Havana of Varadero cu ta bon conoci caba pero kier mercadia Cuba completo cu tur e diferente caracteristicanan di e isla. Ministerio di turismo di Cuba ta conciente cu e turistanan ta bay Cuba pa motibonan diferente y nan tin hopi di ofrece. Banda di e beachnan cu ya caba nan ta bon conoci p’e, nan tin sitionan reconoci como patrimonio cultural cu ta aparece riba e lista di World Heritage di Unesco. Ademas, Cuba tambe ta rico na naturalesa.

Cuba tin un averahe di 3 miyon turista pa aña y nan kier sigui crece den turismo. A haci un inventario cual a resulta cu Cuba tin un potencial pa 230 mil camber mas. Pero den e proximo 5 aña ta amplia cu por lo menos 20 mil camber. E prijs pa camber tin un averahe di 60 Dollar pa anochi y esun mas halto ta yega 200 Dollar. E prijs pa anochi ta un diferencia significante compara cu e prijs na Aruba cu den averahe ta core entre 160 pa 170 Dollar pa anochi. Esaki un biaha mas ta ilustra e posicion turistico di nos isla compara cu esun di Cuba.

Minister Otmar Oduber a comparti e vision turistico di Aruba cu e ehecutivonan di Gobierno di Cuba. Aruba contrario na Cuba tin un tamaño chikito y sigur no ta interesa den amplia cu mas hotel. Enbes di cantidad kier traha na eleva e calidad di nos turismo. Pesey no por papia di concurencia entre e dos islanan cu tin diferente vision turistico y mester enfoca riba oportunidad di colaboracion.

A acorda riba exploracion di oportunidadnan manera, “multi destination tourism” , turismo di salud y tambe turismo crucero. A mentiona tambe e inauguracion di vuelonan directo entre Aruba y Cuba cu ta reitera e pasonan cu Aruba ta haci pa forma parti y ta un partner strategico den e desaroyonan cu tin haber cu Cuba. 

Expresionnan haci den e articulo aki no necesariamente ta refleha opinion di ArenaPoliti.co