Aruba cu Cuba cla pa traha hunto den aspecto maritimo 

Na Cuba Minister Otmar Oduber a reuni cu e Minister di Transporte di Cuba César Ignacio ArochaMasid. Un reunion cu a bay den bon ambiente unda a intercambia hopi informacion. Banda di e delegacion diplomatico di Aruba tabata presente diferente director di e diferente departamentonan di transporte publico di Cuba.

Cuba sigur ta elogia maneho di Aruba riba e aspecto di turismo unda minister Oduber a elabora cu cu no ta un hecho automatico cu Aruba un pais cu aproximadamente 120 mil habitante por ricibi y garga 1.7 miyon turista. Tin riba 300 barco pa aña cu ta bishita nos waf cual riba su mes ta un logro fenomenal.

Minister Arrocha a bisa cu Cuba ta pasando dor di un desaroyo interesante unda no por exclui un blokeo di 56 aña cu tabatin riba e desaroyo maritimo. E ta mira cu tin un mision pa bay dilanti. Di otro banda mester menciona cu Cuba tin su aeropuertonan nacional y internacional cu ta di un infrastructura di primera clase. Pues e retonan primordial ta riba e aspecto maritimo y ta interesa den colaboracion cu Aruba den esaki pa desaroya nan sector.

Un colaboracion entre Cuba y Aruba ta brinda oportunidadnan pa e turistanan tin mas posibilidad, por ehempel cu ampliacion di nan terminalnan. Tambe a papia di e posibilidadnan pa un ferri cu por pasa Aruba, Cuba y otro islanan den Caribe tambe. A papia di turistanan cu por bin den e region Caribense cu multiple destinacion, unda atrobe ta mustra e esencia di e lasonan entre Cuba cu Aruba.

Te hasta den e aspecto di turismo crucero no por papia di concurencia.... Cuba ta interesa den turistanan cu ta usa nan isla como “home porting” y Aruba ta interesa den e turista cu ta bin cumpra y contribui na nos economia.

Minister Otmar Oduber a bisa di kier tuma pasonan concreto, y no papia mas pero actua. Su homologo a bay completamente di acuerdo cu ne. Di e forma aki a acorda pa forma un comision entre Ministerio di Transporte di Aruba, ATA y Vice Minister di Transporte y Ministerio di Transporte di Cuba, pa sigui trata e tipo di colaboracionnan manera den e area maritimo y cu servicionan ferri pa wak con lo por cera colaboraciona fructifero. Pues aki ta papia di un punto di implementacion.

Nan ta elogia e lasonan di Cuba cu Hulanda despues di 1998, y ta kere den mantene e relacion stabil tambe cu e otro partnernan den Reino Hunlandes manera Aruba.

Expresionnan haci den e articulo aki no necesariamente ta refleha opinion di ArenaPoliti.co