Fraccion MEP a manda recordatorio  
ORNJESTAD -- Riba 4 mei 2015 fraccion di MEP a pidi un reunion publico pa debati riba e supervision financiero cu a wordo palabra entre Hulanda y Aruba den un protocol firma 2 mei 2015. Den e protocol aki Aruba ta bai di acuerdo pa tin un supervision financiero bou di nomber CAFT.

E tempo cu a transcuri ta di 6 siman y ainda e reunion publico no a wordo jama. Enbista cu den e protocol ta papia cu e ley di supervision financiero mester drenta na vigor no mas tarda 1 augustus 2015 e fraccion geel a manda un carta di recordatorio.
Pa fraccion di MEP e ta importante pa e reunion tuma lugar pasobra mester confronta Promer Minister cu e berdad cruel cu e mes a pone Aruba bou curatela financiero. Ademas di esaki tin varios punto den e protocol cu mester cuestiona. Ta di spera cu presidente di parlamento por asumi su responsabilidad mirando e embergadura di e tema y yama e reunion aki mas pronto cu ta posibel.

Expresionnan haci den e articulo aki no necesariamente ta refleha opinion di ArenaPoliti.co