Dicon minister Otmar Oduber no mester duna cuenta, pero otro fundacionnan si? 

ORANJESTAD -- Durante reunion den Parlamento diamars ultimo a wordo trata e presupuesto pa 2015 di e fondo di turismo. Remarcable ta cu e Minister Otmar Oduber a bai pidi Parlamento un presupuesto di 3.2 miyon florin, pero ainda no a entrega cuentanan anual di e ultimo 3 anjanan.

Lider di fraccion di MEP Evelyn Wever-Croes a baha pisa riba esaki. Segun Wever-Croes un Parlamento cu ta respeta su mes, no ta aproba mas placa pa un fondo asina sin cu e minister duna cuenta di e anjanan anterior. E fondo a haya durante e temporada di 2011 te cu awor 30 miyon florin, pero no ta cumpli cu e obligacion di duna cuenta. Segun e minister nan a pidi oficinanan di accountant pa traha e cuentanan anual, pero nan no ta cla ainda.

SUBSIDIO DI OTRO FUNDACIONNAN TA WORDO CORTA
Si tabata otro fundacionnan no entrega nan cuenta anual, mesora Gobierno ta corta den nan subsidio. Pero awor cu ta un fondo di Otmar Oduber, e si por haya mas fondo sin duna cuenta riba anjanan anterior? Esey ta inaceptable, segun lider di MEP.

Gobierno structuralmente durante 6 anja a bin ta hibando un mal maneho financiero, sin kier duna cuenta di nan mal maneho. E fondo di turismo di minister Otmar Oduber a ricibi 30 miyon florin den ultimo anjanan, y no kier entrega relato anual. Esaki naturalmente no ta aceptable sin un sanccion contra esaki.

"Locual mas mi a lamenta ta cu ningun parlamentario di AVP a pone atencion na e punto importante aki. Nan a djis elogia e minister pero ningun di e parlamentarionan di AVP a hala atencion di e gobierno cu nan obligacion financiero. Ta esaki ta locual a hinca nos pais den problema tanto tempo, ta esaki a pone cu gobierno a redobla nos debe, y awor ta causa cu nos a perde nos automomia. Si e ley aki lo a wordo trata despues di CAFT, e lo no wordo aproba pa CFT, pasobra no tin cuentanan anual entrega. Pesey, si realmente e Parlamento aki ta respeta su mes, hamas e por aproba un presupuesto pa 2015 tanten cu e cuentanan anual no ta traha desde 2012! Fraccion di MEP ta contra e fondo aki, tanten no tin transparencia", lider di MEP e duna di conose.

Expresionnan haci den e articulo aki no necesariamente ta refleha opinion di ArenaPoliti.co