Conclusion di reunionnan di IPKO: Gobernador tabata tin tur motibo pa interveni

Durante e reunionnan interparlamentario di parlamentonan di Aruba, Corsou, Sint Maarten y Hulanda, diaranson a trata e rol di Gobernadornan den e varios intervencionnan y KB. Hulanda a defende e decision tuma pa interveni den e maneho financiero di Aruba.

Mike Eman a haya sosten solamente di e fraccion di AVP. Delegacionnan di demas paisnan Sint Maarten y Corsou no a sali na su defensa manera a ser spera, y Hulanda tabata masha cla den esaki: Gobierno di Reino a interveni pasobra nan a papia hopi anja caba cu Mike Eman pa hasi algo na e crisis financiero, pero Eman no kier a scucha. Nan a alerta Mike Eman cu Aruba ta na borde di bancarota pero Eman no kier a scucha. Nan a hasi palabracionnan cu Eman, pero Eman no kier a tene su mes na nan.

Sr. van Laar di PvdA a bisa: sr. Herde ta hasi manera cos cu e KB a cai for di cielo, pero esey no ta berdad. Gobierno di Reino a taha gobierno di Aruba pa mas di dos anja, pero nada a wordo hasi. Y ora Aruba tabata bayendo den bancarota, y ora cu Gobierno di Reino a realisa cu no tin solucion, a hay;e obliga di intereveni.

Riba e palabranan aki ningun di esnan cu ta ataca Gobernador pa su intervencion, a tribi sigi cuestiona Gobernador den su decision.

Di parti di fraccion di MEP, lider di fraccion Evelyn Wever-Croes a bisa cu mester duna un bista completo di e situacion, y Gobernador ta wordo hopi aprecia na Aruba pa e simple hecho cu el'a interveni, pasobra ta danki na e intervencion aki tur hende ta realisa cu nos tin un problema financiero serio, y asina nos pais a cambia di rumbo. Lider di fraccion di MEP Evelyn Wever-Croes a bisa cu en bes di discuti e formalidadnan, ban concentra riba e problema real: con grandi e problema financiero ta realmente, y con nos ta solucione. Dos pregunta cu por cierto gobierno di Aruba no tin contesta p'e ainda.

Por conclui pues cu e sosten pa Mike Eman pa su welga di hamber y pa e confrontacionnan cu e ta busca constantemente cu Hulanda, no a yud'e cu nada. Tanto Corsou como Sint Maarten a lag'e cai, y den cierto forma lider di fraccion di AVP sr. Rene Herde tambe, cu no a contesta e palabranan duro, pero cla y raspa di sr. van Laar di PvdA.

Expresionnan haci den e articulo aki no necesariamente ta refleha opinion di ArenaPoliti.co