MEP: Contrario na e ponencia di Baba Herde, durante 6 aña di Gabinete Eman tur norma financiero cu nan mes a stipula a ser trapa cu man y pia
Ta increibel con ignorancia ta sigui suta cabez di e lider di fraccion di AVP, sr. Baba Herde. Despues cu Baba pa lunanan largo kier a bende pueblo e politica barata di “eerst groeien, dan snoeien” y cu esaki a resulta den un fracaso total, awor Baba kier cuminsa papia di e normanan cu ta ser aplica door di paisnan Europeo pa loke ta finanzas publico. Den un comunicado titula “Forma di traha cu CFT a adopta di Europa no ta sirbi paisnan chikito”, Baba ta trece padilanti cu den su bista pais Aruba no tin cu tuma e normanan aki ya cu den pasado su partido mes a introduci cierto di e normanan aki cu ta cuadra mas tanto cu e situacion existente na Aruba. En berdad, durante e ultimo 6 añanan Gabinete Eman a stipula algun di e normanan aki pa nan mes ehecuta, pero lamentablemente mester constata cu nan no a cumpli cu ningun di nan.
Norma di deficit financiero
Na momento cu AVP a asumi gobernacion na 2009 den forma insistente nan a splica pueblo cu nan lo implementa un norma estricto pa loke ta reduccion di nos deficit financiero y cu for di 2010 en adelante nan lo percura pa reduci esaki tur aña cu 75 miyon florin. Pues si a cumpli cu e supuesto “norma” aki ya despues di 2 aña, esta na 2012 pais Aruba lo no a conoce deficitnan financiero mas. Sinembargo kico nos ta mira? Bao di e maneho descabeya di malgastamento di placa door di Gabinete Mike Eman nos deficit a crece tur aña for di 188.6 miyon na 2010 te na 406.1 miyon na 2014. P’esey e pregunta na Baba Herde ta: Ta di e forma aki bo gobierno di AVP a cumpli cu e norma cu boso mes a stipula y cu bo ta papia di dje awe?
Norma di gastonan di gobierno
Na aña 2013 Gabinete Mike Eman a bolbe introduci un norma manipulativo, esta e famoso Balanced Budget Akkoord cu nan mes a inventa y cual acuerdo ta encera cu for di 2013 en adelante e gastonan total di gobierno lo no surpasa e suma di 1350 miyon florin, esta e famoso plafond cu nan tabata papia di dje. Nos tur por corda ainda con Baba Herde e tempo ey cu yen di entusiasmo a brasa e supuesto ‘norma’ aki y a declara cu awor si e gastonan di gobierno lo wordo limita completamente y cu su fraccion den Parlamento lo ta vigilante den esaki. Pero kico nos por a mira for di 2013 en adelante? E norma di 1350 miyon florin a wordo trapa cu man y pia, ya cu na 2013 e gastonan total di gobierno a surpasa e norma cu 90 miyon florin y na 2014 e gastonan a bolbe surpasa e norma, e biaha aki cu 137 miyon florin.
Norma di entradanan di gobierno
For di 2010 caba Gabinete Mike Eman a pone como meta cu nan lo percura pa aumenta e entradanan di gobierno y esaki lo ser realisa door di un crecemento economico substancial cu constantemente nan tabata papia di dje. Pero kico nos ta mira? Si na 2010 e entradanan di gobierno tabata 1186 miyon florin, na 2014 e entradanan apenas a yega 1114 miyon florin, pues compara cu 2010, un reduccion substancial cu 72 miyon florin. Aki un biaha mas MEP kier a puntra Baba Herde: Unda e miyonnan extra di entradanan di gobierno a keda pa motibo di un supuesto crecemento di nos economia?
Concluyendo, mester constata cu Baba Herde no tin ningun nocion di kico ta come y bebe di finanzas publico y tampoco e no sa net nada di e normanan financiero cu su gobierno mes a stipula y cualnan te awe ningun di nan a ser concretisa. Riba dje el’a haci su mes ridiculo den pasado door di firma pa un Balanced Budget Akkoord di 1350 miyon florin y cu awor ta resulta di ta un engaño total y esaki danki na e maneho di gasta y sigui gasta di su gobierno di AVP.
Finalmente, si Baba Herde NO kier pa e normanan financiero Europeo wordo implementa riba Aruba, anto e NO mester a permiti su lider Mike Eman firma e protocol traicionero cu Gobierno Hulandes dia 2 di mei ultimo, ya cu esaki lo bay ta e clabo riba e caha di e Status Aparte di Aruba, cu of sin e normanan Europeo.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...