MEP: Cu actualmente CFT ta na Aruba tin un nomber y fam; Gabinete Mike Eman y AVP
Un biaha mas Baba Herde a perde cu strea di Noord
Absurdez a yega na su limite ora cu siman pasa un y tur por a lesa un barbaridad skirbi den medionan local door di Baba Herde, bisando cu “Oposicion ta na fabor di CFT”. Ta increibel e mentira y manipulacion aki di e lider di fraccion di AVP kende te ainda no por caba di sacia su odio y venganza contra MEP. Pero esaki no ta nada straño, ya cu AVP ta conoci di ta un partido cu semper ta busca un victima pa tira tur culpa riba dje ora cu nan mes a comete cierto fechoria of barbaridad.
Culpabilidad
Kende no ta corda con den añanan 50 den e constelacion di Antiyas di 8-8, partido AVP pa puesto di un minister a bende y traiciona nos pueblo cu e cadena di 12-8 bisando cu Aruba no a perde nada, pero cu ta Corsou a haya 4 asiento mas den Staten di Antiyas? Pues nan kier a laba man bisando cu no ta nan culpa cu Aruba a wordo perhudica malamente, pero cu mester busca esaki cerca Hulanda. Kende no ta corda con den e periodo cu sr. Nelson Oduber tabata Promer Ministro, tur loke cu a sosode den e pais aki, partido AVP tabata venena mente di pueblo bisando cu esaki ta pa culpa di Nel?
Ultimamente na November 2012 ora cu e gobierno di AVP – despues di 3 aña di manipulacion y mentira cu nan lo tene e refineria habri – nan mes a logra cera e refineria Valero y un biaha mas nan a trata di tira tur culpa riba MEP, esta cu ta MEP a cera Valero. Ki mentira!
Entrega di autonomia
Awor a yega asina leu cu Baba Herde den un atake di locura y desesperacion – mirando cu tur instancia internacional y local ya ta consciente caba cu ta Gabinete Mike Eman a destrui e pais aki financieramente – ta tira tur culpa atrobe riba oposicion, esta cu ta oposicion ta na fabor di CFT. Ta pesey ta importante pa refresca Baba Herde su memoria pa loke ta yegada di CFT na Aruba y e 24 medidanan cruel proponi door di e propio gobierno di AVP:
1. Tabata e ministernan Mike Eman y Mike de Meza mes a bay di acuerdo - por medio di e carta di ‘geen bezwaar’ di 6 februari 2014 - pa cumpli cu 3 condicion cu Hulanda a impone riba nan, p’asina nan por haya placa fia riba mercado internacional;
2. Tabata e protocolnan firma entre Gobierno Hulandes y Gabinete Eman na 2010 y 2013, caminda a bay di acuerdo pa un organo di supervision wordo institui na Aruba y cu finalmente na 2014 – mediante di e KB di 11 di juli 2014 – CFT a bira un realidad pa Aruba;
3. Tabata Promer Minister Mike Eman mes den un conferencia di prensa a anuncia cu e comision di supervision CFT ta mas cu bon bini na Aruba pa controla presupuesto 2014 y supervisa su propio gobierno;
4. Tabata Gabinete Mike Eman mes cu dia 9 di December 2014 a haci un peticion na CFT pa bin controla y supervisa presupuesto 2015 di pais Aruba y tambe e presupuestonan di 2016 y 2017;
5. Tabata Gabinete Mike Eman mes cu a declara na CFT cu nan ta cla pa tuma 24 medida cruel riba lomba di pueblo y tur esaki pa drecha e situacion financiero di Aruba cu nan mes a desgracia.
Terkedad y arogancia
Hecho ta cu Hulanda a adverti (taha) Mike Eman pa su maneho desastroso y catastrofico pa Aruba. Mike Eman no kier a tende y a sigui cu malgastamento di placa. Tur e problemanan financiero y mal maneho por a wordo evita si AVP y Mike Eman a sigui consehonan di Raad van Advies, Algemene Rekenkamer, Fitch, Standard & Poor’s, IMF, CFT y oposicion den Parlamento, pero AVP su terkedad y arogancia a causa e desaster financiero cu nan a crea pa e siguiente generacionnan.
Manera un y tur por a mira cu den tur e 5 puntonan menciona partido MEP no tabata envolvi y no a toca parti na ningun di e decision y entregamento di nos autonomia financiero. Ta pesey partido MEP ta haya e actitud di Baba Herde pa tira culpa riba MEP relaciona cu CFT completamente robez, absurdo, mentiroso y cu pesey no ta pornada algun luna pasa su colega di partido Dammers a sclama den Parlamento “Wanta e loco ey. Wanta e loco ey”. Esaki ta bisa tur cos di loke Baba Herde ta trece padilanti ultimamente den prensa.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...