Siman pasa por a tuma nota cu tabata tin un precupashon grandi pa cu aumento di “schoolgeld” door di SKOA. Ta importante pa reconose e hecho cu ensenasa ta fundeshi pa loke ta trata continuidat di desaroyo di nos comunidad.

Ensenansa den su totalidat mester ta na cabes di e lista di prioridat di gobierno di Aruba.

Tambe mester para keto na e calidad di bida di e pueblo. Mayornan ta hopi preocupa cu e aumento di “schoolgeld”, mirando cu e situacion financiero di mayoria no ta esun di mas miho. Apenas algun ta logra pa pone pan di cada dia riba mesa. Nan ta biba den pobresa. Si, Aruba conoce pobresa.

Ta un violacion grandi riba e derecho di e ser humano pa permiti pobresa, aunke ta un of dos caso so. Cu e casonan cu mi ta wordo confronta cu ne diariamente den mi area di trabou mi por bisa cu Aruba conoce hopi mas cu un of dos caso so di personanan cu ta biba den pobresa. Permiti pobresa ta un violacion teribel di e dignidat y derecho di e ser humano, sigun e declaracion universal di derecho humano di 10 december 1948. (Proverbionan 31:9;  Habri bo boca, y huzga cu husticia, y defende e derecho di e pober y di hende den necesidat.)

Pobresa no ta solamente e hecho cu bo no tin plaka of cu loke bo tin no ta jega pa cubri e gastonan basico di necesidat  diario. Ta nifica tambe cu pa e motibo aki bo tin menos chens di logra termina un bon estudio cu lo por duna bo un bon trabou pa asina bo por jega na un dak riba bo cabes cu ta adecuado pa bo y bo famia. Ta nifica tambe cu pa motibo cu no tin plaka of pa motibo cu e plaka cu tin no ta suficiente pa pone cuminda riba mesa diariamente pa bo famia, bo lo por tin menos chens di biba un bida saludabel. E stress diario pa logra alimenta, cuida y protega bo famia por causa hopi problemanan di salud, tanto fisico como emocional.

Pobresa ta produci negligencia y maltrato. Mayornan tin cu traha dos trabou y casi nan no tey na cas pa pasa tempo di calidad den famia cu nan juinan,  mayornan ta cansa di e tanto trabou y e stress cu e ta trese cu ne, esaki por causa cu mayornan ta bai tin menos tolerancia pa e comportacion di nan juinan. Tur esaki na su turno por ta causa di aumento di criminalidad riba nos isla.

Pesey un maneho strategico pa combati pobresa mester ta di preferencia riba e lista di prioridat di gobierno. Stimula cresemento di economia, inverti den ensenasa lo no tin e efecto desea si no mehora calidad di bida di esnan den necesidat. E situacion social di Aruba a wordo neglisha pa hopi anja. CFT ta bisa cu pa anja 2034 of pa 2039 Aruba lo “sali” di e abismo cu e ta hinka aden actualmente y cu e lista di 24 medidanan cu lo bin na vigor, pobresa lo aumenta hopi lihe si no pone atencion awor na e situacion. “Reconose un problema prome cu e bira un emergencia, ta prueba di un bon liderazgo”

Pobresa ta mas cu un problema di placa e ta un problema cu tin influencia ariba salud, ensenansa, educacion…. y mas principal ariba e independencia economico di un persona.

Trahando conhuntamente cu e diferente departamento y instancia cu ta duna cuido, ensenansa, educacion, guia, tratamento na e comunidad, gobierno tin e posibilidad pa jega na un maneho  strategico integral cu ta duna posibilidad pa drecha e posicion di esnan den necesidat y contribui na hisa nan calidad di bida y preveni (prome cu tin cu lamenta) cu e problema aki ta bira mas grandi.

Expresionnan haci den e articulo aki no necesariamente ta refleha opinion di ArenaPoliti.co