ORANJESTAD - Diaranson mainta Minister di Finanzas, Angel Bermudez tabata presente na e apertura di CIBC First Caribbean International Bank situa na Miramar Building. Segun e mandatario e banco aki no ta desconoci den region pues, actualmente tin mas cu 10 sucursal den Caribe. “Mi ta contento cu un banco descendiente Canades tin asina tanto confiansa den Aruba y su economia pa habri un sucursal akinan”, asina e mandatario a expresa.

Segun Pim van der Burg, Managing Director Dutch Caribbean e aña aki lo cuminsa cu asina yama ‘oficina di representacion’ y den transcurso di proximo aña lo habri un otro oficina caminda cu lo brinda tur tipo di servicio na Aruba. “Mi ta spera cu nan presencia den nos comunidad lo contribui na un miho calidad di servicio como productonan bankero y mi ta spera esaki yuda y contribui tambe na innovacion pa loke ta trata e palet completo di servicionan brinda na Aruba”, Minister Bermudez a bisa.

Finalmente e mandatario ta desea henter ekipo di CIBC First Caribbean International Bank tur clase di exito den e fase inicial aki na Aruba.

Expresionnan haci den e articulo aki no necesariamente ta refleha opinion di ArenaPoliti.co