Despues cu e rapport di CFT di 4 di juni 2015 a bira conoci, un y tur por a saca un solo conclusion:  Gabinete Mike Eman te ainda no a logra pone orden den tur e desorden financiero cu nan mes a crea durante e ultimo 6 añanan! Den e rapport ultimo, CFT a trece 6 recomendacion bon cla padilanti, den cual nan ta conseha gobierno pa entre otro aumenta e BBO/BAZV cu 1½% y percura pa esaki yega te cu 4%. Alavez nan ta conseha gobierno pa sigui aumenta e porcentahe di BBO/BAZV den curso di e aña aki, ya cu CFT ta para hopi skeptico pa loke ta e normanan financiero cu gobierno mes a fiha pa aña 2015, ya cu tur cos ta indica cu nan lo no por cumpli cu e normanan aki.

Progreso di medidanan
Asina nos por a tuma nota di un tabel den e rapport ultimo di CFT den cual un bista ta wordo duna di e realisacion di e presupuesto 2015 pa loke ta e promer kwartaal di e aña aki. Den e reportahe ta ser treci padilanti cu den e promer kwartaal di 2015 tanto e entradanan como e gastonan di gobierno a ser realisa pa mas o menos 25% di e presupuesto total, esta 25.4% resp. 23.7%. Alavez den e reportahe aki informacion adicional a ser duna di e progreso di e medidanan cu gobierno mester a tuma den e promer kwartaal di 2015. Locual a resalta ta cu segun CFT tanto e medidanan pa aumenta e entradanan di gobierno como e medidanan pa baha e gastonan di gobierno (reduccion di e deficit financiero) a keda atras compara cu loke gobierno mes a proyecta.

Proyeccion versus realisacion
Segun e meta y proyeccion di gobierno e medidanan pa aumenta e entradanan den 2015 lo mester yega te 79.5 miyon florin. Pero gobierno a logra aumenta e entradanan cu solamente 15 miyon florin den e prome kwartaal di e aña aki, cual ta ekivalente na un porcentahe di solamente 18.8%. Pa loke ta e gastonan, gobierno a proyecta cu e medidanan pa reduci e gastonan den 2015 lo mester yega te 276.1 miyon florin. Sinembargo Gobierno a logra reduci esaki cu solamente 53.7 miyon florin den e prome kwartaal di 2015, esta cu 19.4%. Mas aleu CFT ta premira cu gobierno lo haya solamente 61.3 miyon florin – door di cobramento di belastingnan atrasa - di e suma total di 79.5 miyon florin cu nan mes a proyecta. Pa loke ta e gastonan, e realisacion di e medidanan pa baha e gastonan di personal y di AZV ta kedando atras, segun CFT.



Un pueblo den dolor
E desaroyo di e dos indicadornan aki, esta e entrada y gastonan di gobierno den e promer kwartaal di 2015 ta mustra claramente cu gobierno ta core atras pa loke ta e meta y proyeccionnan cu nan mes a stipula. Ta pesey mes CFT den su rapport ultimo ta mustra bon cla su preocupacion pa e calidad di e control financiero, especialmente pa loke ta e realisacion di entradanan di gobierno. Tambe CFT ta papia cu mester tin cautela na momento di interpreta e cifranan aki, ya cu esakinan ta cifranan cu bin di e propio gobierno. Sin duda cu partido MEP tambe ta sumamente preocupa pa cu henter e desaroyo financiero aki y pesey ta urgi Gabinete Mike Eman pa cuminsa na corta den nan propio gastonan di luho, stop di malgasta placa di pueblo manera cu no tin mayan y pa stop di keda tira tur medida riba lomba di pueblo. E pueblo den tur su sufrimento y den dolor no por sigui carga mas medida den 2015 y den e proximo añanan.

Expresionnan haci den e articulo aki no necesariamente ta refleha opinion di ArenaPoliti.co