Den e rapport di 4 juni e organo di supervision financiero CFT ta indica cu probablemente e deficit presenta di 3.7% den presupuesto 2015 no ta correcto. Den un comunicado anterior nos a subraya cu pueblo no mester descarta cu e deficit por ta mas grandi y nos a referi na diferente hechonan 1) cu CFT na varios occasion a expresa cu Gabinete Eman lo no ta cumpliendo cu su propio normanan y 2) cu Instancianan internacional manera Fitch y IMF a indica deficitnan di 4.2% & 4.5%. Pesei e ta ironico con lider di fraccion di AVP ta expresa cu nan ta cumpliendo cu normanan.
Ehempelnan di pasado desde 2014 ta muestra suficiente cu Gabinete Eman nunca por a cumpli cu su propio acuerdo di balanced budget akkoord y cu na 2 ocasion a surpasa nan limite di gasto di 1.350 biyon y tampoco por a yega e base di entrada di 1.150 biyon. Pesei e no ta un sorpresa cu CFT ta duna di conoce cu e cifranan presenta di e promer kwartaal di 2015 no ta indicando cu lo bai realisa e metanan fiha pa 2015. Den e proximo alinea nos ta splica dicon.

E norma cu CFT a usa pa analisa y evalua e componentenan di entrada y gastonan presenta door di Gabinete Eman y pa por midi si e cifranan presenta a wordo realisa ta di 25%. Esaki den principio ta representa un kwartaal. Pa e banda di genera entrada a presupuesta cu lo cobra un suma total di 79.5 miyon door di intensificacion di cobransa di belasting. Te cu awor aki a intensificacion di cobransa di belasting a trece 15 miyon florin aden cual ta representa un cifra di realisacion di 18.8%. Logicamente esaki no ta yegando e norma di 25%. Pa bay mas den detayes CFT ta premira cu no lo realisa mas di 61.3 miyon (77% maximo) faltando 18.2 miyon florin den e presupuesto.

Pa loke ta trata realisacion di reduccion di gastonan door di Gabinete Eman esaki tambe ta kedando atras. Gabinete Eman a presenta den su plan di balanced budget akkoord cu lo bai reduce un total di 276.1 miyon florin. Actualmente e cifranan ta duna indicacion cu solamente 19.4% a wordo realisa. Dus pa e banda di gasto esaki tampoco ta yegando e norma di 25%. Si e sigui cana e rumbo aki Gabinete Eman kizas por logra realisa aproximadamente 77.6% cual lo nifica 215 miyon florin. Dado caso esaki ta nifica cu lo falta ainda pa reduci 61.3 miyon florin.
Netamente basa riba e ehempelnan concreto menciona akiriba CFT a indica bon cla cu resultadonan conoci den e promer kwartaal ta laga di desea y pa e motibo aki e ta hasi e dificil pa por evalua e parti realistico di e deficit di 3.7% presenta den presupuesto 2015. Es mas pesei den su conclusion CFT ta bolbe ripiti (mi ta cita)” De uitvoering van de begroting 2015 niet automatisch zal leiden tot een tekort van 3.7%. Veel werk is nodig”. Pa termina e ta obvio cu Gabinete Eman nunca desde comienso a demostra responsabilidad y ta di lamenta cu cada biaha ta continua na hunga cu e destino di nos finansas publico.

Expresionnan haci den e articulo aki no necesariamente ta refleha opinion di ArenaPoliti.co