ORANJESTAD – Tabata un placer pa Prome Minister Mike Eman di sali un poco mas tempran cu custumber for di cas y yega na tereno di construccion di MFA Paradera pa presencia bashamento di vloer di e fundeshi. Plannan pa ehecucion di e edificio multi-funcional den e bario ta bayendo satisfactoriamente y segun plan, mientras cu MFA Noord ta yegando cerca di su fecha di apertura.

Caracteristico di su persona, Prome Minister Eman a yega y dal boots di rubber halto bisti pa yega cerca y uni schouder cu schouder cu e trahadonan. Asina a yuda basha e 56 meter cubico di beton cu ta forma e base di e di dos facilidad multifuncional den bario cu ta construi, den un total di cinco rond di e isla.

Presente tabata Ir. Joel Croes, diseñador di e edificio y tambe miembronan di e ekipo di maneho di MFA. Premier Eman a papia cu director di Thiel Corporation, contratista local encarga cu e trabou, pa asina pone su mes na altura di e ultimo desaroyonan di e trabou.

Vision pa establece un MFA den cada districto pa reemplasa y amplia e servicionan di Hulpbestuurskantoor, ta un di e metanan cu mas ta yega na curazon di nos prome mandatario. Semper e ta pendiente pa tur cos cana manera mester ta y cu e deseo y necesidadnan di e pueblo ta keda satisface.

Ademas di tur e servicionan existente di un Hulpbestuurskantoor, MFA ta introduci den cada districto espacio pa reunion, manifestacion cultural, cafetaria, biblioteca y servicionan adicional manera AZV y otro instancianan publico. Den caso di Paradera, comunidad a pidi pa espacio caminda por duna les di religion y a cumpli cu esey. Cada MFA ta traha segun deseonan di habitantenan di cada bario.

Minister President Mike Eman su deseo ta pa tur cinco MFA keda cla den e proximo añanan. Despues di Noord y Paradera, e trabou ta sigui na Savaneta, Santa Cruz y San Nicolas. Cu esaki Gabinete Mike Eman I y II ta duna pueblo un servicio nobo na e nivel cu merece, “e nivel cu pa hopi aña no por a mira,” e mandatario a bisa. MFA ta bin pa haci e bida di e ciudadano mas facil, pero tambe pa incentiva e goso en comun di espacionan publico.

Expresionnan haci den e articulo aki no necesariamente ta refleha opinion di ArenaPoliti.co