ORANJESTAD – “Cada dia nos ta yegando mas cerca di realisacion di un bunita proyecto pa pais Aruba cu miho servicio pa pueblo di Noord,” Prome Minister Mike Eman a bisa diabierna mainta para riba dak di MFA Noord. E mandatario a bay eynan pa personalmente presencia e trabounan di instalacion di e panelnan solar. Ademas cu ta yegando mas cerca di su apertura oficial, e sistema di produccion di energia renobabel ta bay percura pa e edificio ta auto suficiente pa loke ta su consumo di coriente. Esaki ta hacie e prome edificio publico cu ta 100% sostenibel.

MFA Noord a wordo diseña y construi pa pas den e vision di Gabinete Mike Eman di independencia energetico, ademas tambe di un miho nivel di calidad di servicio na pueblo, y e sinti comunitario cu un luga caminda por topa.

Mirando e resultado satisfactorio, Prome Minister Eman a felicita e Management Team di MFA, pero tambe su coleganan di Energia Minister de Meza y di Infrastructura, Minister Sevinger pa nan aporta na e proyecto. InfraTeam y SOGA tambe tabata clave den ehecucion di e plan, mescos cu arkitecto ir. Orlando Hoevertsz y empresa di construccion Bohama.

E parti di e panelnan solar ta den man di e compania local Retraco cu tambe ta kere den e vision di un isla sostenibel y a incursiona den e mercado di energia solar. Minister President Eman a splica cu 330 panels riba e dak di MFA Noord ta bay produci 99kW cu ta bay riba e sistema di grid di Elmar y di eynan e edificio ta tuma loke ta consumi.

Premier Eman a felicita director di Retraco, sr. Reyes, cu e bon trabou cu nan ta desplegando na e edificio na Noord, pero tambe pa tuma e decision di ofrece comunidad local e opcion di solar panels.

Vision di Gabinete Mike Eman I y II pa yega na e meta di 100% di sostenibilidad ta riba caminda cu e prome molina di biento, parke solar grandi, pero tambe esnan mas chikito cu ta bin rond Aruba. Den algun siman, Prome Minister a comenta, ta bay cuminsa cu dos di e 20 scolnan cu ta bay haya panel solar riba nan dak. Un proyecto cu Gobierno ta haciendo hunto WEB y Elmar.

Expresionnan haci den e articulo aki no necesariamente ta refleha opinion di ArenaPoliti.co